Les CC.AA del norte aconceyen p'aumentar la seguridá na pesca

Los directores de los institutos de seguridá y salú llaborales d'Euskadi, Galicia, Asturies y Cantabria van aconceyar en San Sebastián p'avanzar nel desarrollu de midíes p’amenorgar la siniestralidá y pa la meyora de la salú nel sector pesqueru.

Según informó'l Gobiernu vascu nun comunicáu, tres l'alcuentru celebráu'l pasáu mes de payares en Santiago de Compostela, la xunta de la capital guipuzcoana, entamada por Osalan, va valir, ente otros asuntos, p'afondar nos conteníos d'una futura 'Guía pa la vixilancia de la seguridá y la salú nel sector pesqueru'.
  
La ellaboración del manual forma parte del paquete de midíes recoyíes nel Plan d'Osalan pa la prevención de riesgos llaborales nel sector pesqueru vascu. Por ello, especialistes en medicina del trabayu, prevencionistes y profesionales del sector pesqueru, tán trabayando nes midíes preventives que se van deber adoptar nun oficiu tan espuestu a los riesgos llaborales.
  
De la mesma manera, la duración de les xornaes y la so organización ye distinta a la mayor parte de los oficios. Según datos de la Encuesta de población activa (EPA), más de la metá de les persones ocupaes en llabores rellacionaos cola pesca supera les 50 hores selmanales de trabayu.

Riesgos
L'Executivu vascu detalló qu'ente los riesgos rellacionaos cola seguridá, los más destacaos, ente otros, son "les posibles cayíes al mar al embarcar y desembarcar o nel desarrollu de l'actividá, mientres les maniobres de llargáu y viráu de la rede, o al subir les captures al barcu".
  
"El ruiu eleváu, les vibraciones, los restos orgánicos del productu y les condiciones ambientales de temperatura y mugor, la realización d'operaciones y vezos en postures desaparentes y forzaes nun mediu non estable en continuu movimientu son, coles mesmes, riesgos comunes nesti tipu de trabayu", añadió.