Les axencies tributaries y la descentralización fiscal

Yá ta debatiéndose, polo menos nel nel ámbitu universitariu, la creación d´axencies tributaries autonómiques, una novedá de la que se faló per primer vegada al apaecer el pautu de gobiernu catalán ente PSOE, ERC y IC. Dellos caderalgos universitarios como Octavio Granado y Jesús Ruiz-Huerta, economistes de la Universidá Rei Xuan Carlos I de Madrid y del Institutu Universitariu Ortega y Gasset venlo mui claro: facer axencies tributaries ye una oportunidá pa meyorar la xestión. Anque nun ta demostrao que crear estes axencies pueda menguar el fraude fiscal, estos economistes argumenten que les axencies tributaries autonómiques salvaríen les torgues qu'hai anguaño en materia de collaboración fiscal ente autonomíes y estáu

Nesti sentíu, un informe qu'espublizó la OCDE va poco diz que la descentralización fiscal ye bona pa la tresparencia y pa un mayor control democráticu de los impuestos. Xunta esto, un bon sistema de financiación de les Comunidaes Autónomes sedría la otra pata del bancu pa garantizar dafechu la calidá de los servicios públicos. La redistribución de la riqueza, cuestión venceyada a les polítiques de quien gobierne en cada momentu y a la esistencia d'un sistema redistributivu xustu ente rexones tamién meyoraría según la OCDE cola cesión d'impuestos a les rexones. Tamién esti informe fai referencia a una posible y sana competencia fiscal ente rexones lo que reduciría la presión fiscal y un intentu de meyorar los servicios públicos aprovechando meyor el gastu.

Anguaño, dientro d´Europa, Reinu Xuníu y Francia representaríen los modelos tributarios más centralistes mentantu qu'Alemaña ye un exemplu de federalismu fiscal.

El debate yá ta abiertu y el mesmu PSOE entró nelli cola proposición de crear diecisiete axencies tributaries con un espaciu fiscal propiu. La propuesta ye que les Comunidaes Autónomes puedan gastar, recaudar y llexislar los impuestos propios y cedíos mentantu que´l Gobiernu central caltendría'l poder sobre los impuestos de calter estatal. Les propuestes económiques del partíu de Zapatero vienen avales pol so nuevu asesor nesti ámbitu, el economista ex BBVA Miguel Sebastián. Anque les propuestes económiques del PSOE tienen un marcáu corte lliberal, la creación de les axencies tributaries autonómiques pue ser, ensin dulda, la gran novedá que s'enxerte nel siguiente ciclu de remocique de los estatutos d´autonomía. Delles Comunidaes Autónomes ya piden estatutos nuevos, casu de Cataluña o d´Andalucía. Nel tema d'axencies tributaries autonómiques Andalucía, Estremadura y Canaries ya dixeron que quieren organizar el so espaciu fiscal propiu. La entruga ye la de siempres ¿y Asturies?