Les acusaciones coinciden en pidir la culpabilidá de Campelo

El Ministeriu Fiscal y les acusaciones particulares del PSOE y IX coincideron ayeri en que l'ex - conceyal de Llangréu, José Laudelino Campelo ye culpable de delitu de sobornu por pidir dineru a los empresarios que pretendíen instalar un Centru comercial en Llangréu, y refugaron la idea que sostién la defensa de que la imputación de Campelo ye "frutu d'una confabulación como venganza".

El procesu xudicial remató ayeri coles conclusiones de les partes y l'alegatu del acusáu. El xuráu popular, formáu por nueve persones, va entamar les deliberaciones güei. La fiscalía y l'acusación del PSOE piden una pena d'añu y mediu de cárcele por delitu de sobornu. Pela so parte, l'acusación exercida por IX rebaxó la pena inicial de cuatro a dos años por delitu de sobornu y refugó que se produxera un segundu delitu de tráficu d'influyencies.

El Ministeriu Fiscal espunxo que l'empresariu de Codema, Pedro Piñera, interesáu n'instalar el Centru Comercial en Llangréu, "tenía mieu de les maniobres" que podía realizar Campelo pol so "pesu políticu nel PSOE asturianu". Por elo, continuó la fiscal, Piñera escribió una carta al alcalde de Llangréu na que-y pidía "tresparencia". La fiscal afirmó nel xuiciu y tres lleer la trescripción de la cinta na qu'apaez grabada una conversación ente l'ex edil y los empresarios de Codema-Leclerc, Pedro Piñera y Juan Pedro Iriazabal que quedó claro que Campelo pidía dineru.