L'equipu del Sidrón presenta afayos nuevos

El xefe de les escavaciones na cueva del Sidrón (Piloña), el caderalgu de la Universidá d'Uviéu Javier Fortea, presentó l'últimu restu atopáu na cueva, un maxilar en perfectu estáu de conservación -debío a que taba resguardáu por sedimentos- al que solo-y falten trés dientes que s'alcontraron na redolada. Tien les mueles del xuiciu y les pieces nun tán mui gastaes polo que se trata d'un adultu mozu.

Según Fortea trátase d'un material "realmente importante" ensin precedentes n'España y mui pocos n'Europa, polo que considera que los antropólogos "van saca-y un gran partíu". El maxilar va facilitar conocer la organización de l'arquitectura de la cara.

Pel momentu atopáronse nel Sidrón más de 1.400 fósiles óseos -55 na campaña d'esti añu, de los que cinco nun son humanos- ente húmberos, la vértebra primera del sacro, fémur, maxilar y dientes que correspuenden a individuos de neandertal. Por ello, los espertos consideren que la cueva cuenta colos restos más relevantes de la Península Ibérica pal estudiu de los neandertales y el so pasu a sapiens.

Con motivu de la presentación d'estos afayos, el director xeneral de Patrimoniu del Principáu d'Asturies, Adolfo Rodríguez Asensio, anunció que l'equipu investigador de la escavación de la cueva del Sidrón, va preparar un llibru de carácter "científicu, seriu, rigurosu pero también divulgativu" sobre los restos atopaos na cueva, asina como del pasu del neandertal al sapiens. Según Asensio, la publicación va asoleyase d'equí apoco, anque nun concretó la fecha ya que ye una propuesta inicial. La intención de la Conseyería de Cultura ye apurrir a la ciudadanía una publicación científica dau l'interés qu'espertó la escavación.