L'ecoloxismu asturianu prepara'l premiu al mayor enemigu del mediu ambiente nel 2006

La Coordinadora Ecoloxista d'Asturies convoca la entrega del premiu "Buyada Purpurina" que tolos años, per esti tiempu, "reconoz" el llabor de les persones o entidaes que más fexeron pol estrozu mediuambiental n'Asturies. Ente los nominaos pa la edición 2006 del premiu apaecen el Delegáu del Gobiernu Antonio Trevín, el Presidente asturianu Álvarez Areces o'l presidente de la Confederación Asturiana de la Construcción Serafín Abilio. El premiu negativu va entragase, como tolos años, el 28 d'avientu, día de los inocentes.

El premiu, que fuera na so edición 2005 pa la Viceconseyera de Mediu Ambiente del Principáu Belén Fernández y que cuenta na so llista de ganadores con José Ángel Fernández Villa o Daniel Gutiérrez Granda, supón siempre pa la entidá que lu convoca un llabor abegosu pola gran cantidá de posibles candidatos al mesmu, pente los que la Coordinadora Ecoloxista asegura que namás escueye "a los más señalaos. D'esta miente, la candidatura p'Antonio Trevín, vien por "derrochar les fuerces d'orden publicu que tien persiguir ecoloxistes en cuenta d'a chorizos inmobiliarios" en referencia al control policial pola acampada ecoloxista en protesta pol embalse de Caliao (Casu) y pol so "esmolecedor pasáu como alcalde de Llanes".

Vicente Álvarez Areces ye otru de los candidatos al premiu pola so "nefasta xestión ambiental" y por "echar a andar proyectos de "grave impactu ambiental" mientres que'l xefe de la patronal de la construcción CAC apaez nomináu por "pidir un desarrollu agresivu con miles de segundes residencies en llugares protexíos" y esixir "infraestructures innecesaries" que namás beneficien a les constructores.
La empresa Río Narcea Gold Mines, l'alcalde de Cuideiru Francisco González, el Conseyeru d'Industria Graciano Torre, la empresa Ence-Ceasa, el Conseyeru d'Infraestructures y Mediu Ambiente, Francisco González Buendía y les operadores de telefonía móvil, pola so política d'instalación masiva d'antenes repetidores, completen el llistáu de candidatures.