León: “Tamos dispuestos a escuchar, pero nun tamos pol llabor de pautar nada colos responsables del espoliu de la ciudadanía”

Les sensaciones en Podemos son bones. La respuesta de la xente en tolos actos entamaos y “la ilusión” qu’amuesa fai que’l so candidatu Emilio León Suárez (Xixón, 1977) sía optimista de cara al 24-M, cita que considera importante “pa cambiar les nuestres vides”.

¿Cómo ta desenvolviéndose la campaña?

Con muncha intensidá, sacando tiempu d’onde nun lu hai y queriendo tar en tolos llaos porque  hai muncha xente qu’atender y muncho que deprender d’esa xente. Por fortuna contamos con un equipu de persones entregaes y poco amigues de dormir.

La respuesta de la xente ta siendo multitudinaria en tolos actos.

La xente ye la razón de ser de Podemos. Hai interés por escuchar les nuestres propuestes, y como la cobertoria mediática ye la que ye, ye  normal que la xente s’acerque a los actos. Significa qu’hai fame de política.

¿Hai bones sensaciones pal domingu?

Les sensaciones son les que tresmite toda esa xente que nos da fuelgu y nos pregunta ycomparte con nós les sos esperiencies y los sos problemes. La ilusión d’esa xente ye tan grande que les sensaciones tienen que ser bones a la fuerza.

Les encuestes muestren unos resultaos mui axustaos, pero dan trunfu siempre pal PSOE en minoría.

Coles encuestes tenemos la esperiencia d’hai un añu, nes eleiciones europees, onde’l resultáu tuvo mui percima de les mires y los sondeos. Hai que ser prudentes pero sobre manera hai que ser conscientes de que les eleiciones que cuenten son les del domingu.

¿Podemos taría dispuestu a negociar un posible pautu cola formación liderada por Javier Fernández?

Podemos nun va facer pautos a escondidielles nin va zarrase a negociar  investidures o puestos. El nuestru compromisu ye cola xente y col programa, y hai unes llinies coloraes que los nuestros votantes conocen y que nos obliguen.

¿Cuáles seríen les condiciones mínimes pa llegar a un alcuerdu?

Tamos dispuestos a escuchar a tol mundu, pero nun tamos pol llabor de pautar nada colos responsables del espoliu de la ciudadanía. Si hai dalguién  que crea que se pue empezar a negociar dexando de llau les necesidaes  urxentes de la xente o’l cumplimientu de los derechos básicos de les persones, enquivócase de medio a medio.

¿Sorprende-y l’ascensu de Ciudadanos nestos últimos meses?

L’ascensu de Ciudadanos de momentu ye un fenómenu puramente demoscópicu. N’Asturies presenten a un candidatu que nun ye Albert Rivera, anque quieran facenos pensalo, y de númberu dos lleven a Ignacio Prendes…

¿Por qué hai que votar Podemos el 24-M?

Porque nun vamos tener una segunda oportunidá de cambiar les nuestres vides. Y porque nun lo facer ye da-yos oxíxenu  a los mesmos qu’estrangularon al nuestru país.