L'Autovía del Cantábricu, finada tres llustros de retrasu

Mariano Rajoy, presidente del Estáu español, acudió a Asturies pa la inauguración del tramu caberu de l'Autovía del Cantábricu. La vía ye una realidá tres llustros de retrasu.

Tuvieron que pasar 25 años pa terminar la obra nel país, autovía que coneuta Santiago de Baamonde con Irun y que n'Asturies tien 231 quilómetros de percorríu. Problemes cola so tramitación y, depués, cola estabilidá del terrén, dexaron el tramu 'Unquera-Llanes' como'l caberu n'abrise nel nuesu territoriu tres años de denuncia pol retrasu de les obres. Nel actu d'inauguración, na que Rajoy tuvo acompañáu por Ana Pastor, ministra de Fomentu, el líder popular destacó'l papel importante que xuega la vía nes rellaciones ente Galicia, Asturies, Cantabria y Euskadi. Mentes, Javier Fernández, presidente del país, recordó-y les obres pendientes, como l'autovía a La Espina o los accesos a El Musel.

Otra manera, les Asamblees de Trabayadores en Llucha d'Asturies acudieron a Bustiu, llugar onde tuvo llugar l'actu, pa recordar a Fernández y Rajoy l'Asturies "de los 100.000 paraos y paraes, la de los pieslles d’empresa, EREs y despidos, la que sufre la corrupción, les privatizaciones de los servicios públicos, los retayos sociales...".