L’autonómica va emitir dende’l Parque Tecnolóxicu

Énte la imposibilidá de tener preparáu'l Cnventu de les Clarises na fecha prevista pal aniciu de les emisiones, el Gobiernu autonómicu dio anuncia ayeri de l'alquisición d'un edificiu en Parque Tecnolóxicu de Xixón pa que faiga de sede provisional de la TV.

L'edificiu, que costó 3.318.112 euros y que yera propiedá de l'Autoridá Portuaria de Xixón, va ser la sede provisional dende la que va emitir la RTVA mientres se fai la obra de remocique que precisa'l Conventu de les Clarises de la Universidá Llaboral, que va ser la sede definitiva del Ente. Según el Conseyeru d'Economía Jaime Rabanal, l'alquisición inxérse dientro de la política de l'Alministración Autonómica de facese con inmuebles en propiedá pa centralizar nellos servicios, colo que, en pasando la TV pal Conventu, l'edificiu va quedar pa treslladar allá delles dependencies y oficines de l'alministración autonómica que s'alcuentren agora en dellos locales nel centru de la ciudá.

L'aniciu de les emisiones de la RTVA va facese'l 8 de setiembre, día d'Asturies, en que la RTVA va poner nel aire los actos oficiales de la xornada, que van facese en Pravia y Cuadonga. Dempués d'esi día, la TV va siguir emitiendo señal en prebes hasta que pa ´ltimos de la primavera del 2006 tea en condiciones d'emitir con normalidá.

D'otra manera, l'ente ta acabante d'estrenar la so páxina web, que namás tien los sos conteníos en castellán y al traviés de la que ye posible acceder a toles convocatories públiques que fai l'Ente y conocer l'equipu directivu de la mesma.