L'asturianu que tomó París

El presidente en funciones del Gobiernu asturianu Jaime Rabanal participa esta mañana nos actos d'homenaxe nel 60 aniversariu de la lliberación de París pola tropa aliada n'agostu de 1944. París vístese de gala estos dos díes pa celebrar los díes más intensos de la so historia, coles columnes aliaes apurando'l pasu pa tomar la ciudá mientres Hitler daba la orde d'esbarrumblar cada monumentu al mesmu tiempu que la capital gala entraba nuna situación de revuelta urbana na que los sectores estratéxicos entraben en fuelga y los milicianos de la resistencia s'engarraben a tiros cola tropa alemana.


Un asturianu, Manuel Fernández Arias, ye ún de los supervivientes de la 2ª División Blindada o "División Leclerc" la primera qu'entró na capital francesa tres de cuatro años d'ocupación nazi la tarde del 24 d'agostu de 1944. Desconocíu pa los más de los asturianos, Manuel Fernández foi ún de los munchos asturianos qu'iguaben aquella división, fecha mayormente por antiguos combatientes de la Guerra Civil, bien d'ellos veteranos tamién de la Revolución d'Ochobre, que participaron colos aliaos na lliberación de Francia col enfotu de que'l réxime de Franco se convirtiere nel siguiente oxetivu a valtar.


Manuel Fernández Arias ñaciere en Marentes (Ibias) en 1919, y, con namás 18 años, allistóse na milicia republicana al poco d'entamar la Guerra civil. Poco dempués, el y el so padre cayíen en manes de los franquistes en Balmonte, yendo presos a la fábrica de fariña de Xixón, una de les munches cárceles improvisaes qu'estraben el territoriu tomáu polos nacionales. El padre de Manuel morrió presu, pero elli pasó un llargu calvariu de dos años y mediu de trabayos forzaos enantes de poder escapar pa Francia xunta otros trés presos.


La paz tampoco nun diba durar muncho pa la otra parte de la cordal pirenaica. L'ataque alemán col que la Segunda Guerra Mundial entraba en Francia llevó a Manuel a apuntase a la Lexón Estranxera, pero Petain claudicaba énte la máquina de guerra nazi y Manuel víase obligáu a fuxir otra vuelta, esta vegada a Túnez. Ellí foi onde entró en contactu col Xeneral Leclerc, ún de los militares al serviciu de la república francesa nel exiliu. Leclerc creó a lo llargo de meses d'entrenamientu nel desiertu de Marruecos un grupu de combatientes de primer fila nel que Manuel Fernández tenía cargu de cabu. Con esi rangu, y cola compañía de Leclerc, Manuel desembarcó l'un de xunetu de 1944 nes playes de Normandía.

La so compañía yera la CA3, encargada de carretar el material pesao d'artillería y fecha, en más d'un 80%, por españoles veteranos de la Guerra Civil. Anque la marcha sobre Francia foi rápida, tomando la capital en mes y mediu, tampoco nun foi un paséu. Diez díes enantes de la lliberación, Manuel recibió un tiru mientres preparaba una ametralladora, quedando con una mancadura en brazu qu'entovía-y duel.


Acabante la guerra, los republicanos contaben con que la presión internacional, política o militar, echare a Franco del gobiernu d'España, pero ello nunca llegó a facese realidá. Como otros munchos, Manuel aceptó una paga por invalidez y apuntóse a unos cursinos de formación de tapicería, entrando a trabayar nunos grandes almacenes de Bretaña, onde vive anguaño, hasta retirase. Francia concedió-y en 1954 la Lexón d'Honor, y Asturies, el próximu día 7 de setiembre, va poné-y la medaya de plata del Principáu d'Asturies, una de les máximes condecoraciones qu'entrega la Comunidá Autónoma, reconocimientos a una vida de sufrimientos y negación.


Recomendamos la llectura d'estos artículos de José María Laso Prieto, que fai un repasu a la trayectoria de los asturianos de la resistencia francesa y d'Eduardo Pons Prades que resume la participación de republicanos españoles na llucha pola lliberación de París