L'asturianu pue quedar escluyíu del "gran modelu fundacional de llinguaxe d'Intelixencia Artificial"

Pedro Sánchez anuncia una iniciativa pionera n'Europa, pero namás pa les llingües oficiales.

Nel marcu del GSMA Mobile World Congress (MWC) de Barcelona'l presidente del Gobiernu del Estáu daba a conocer que "vamos trabayar n'estrecha collaboración público-privada col Barcelona Supercomputing Center y la Red Española de Supercomputación, xunto cola Academia Española de la Lengua y cola Asociación de Academias de la Lengua Española, na construcción d'un gran modelu fundacional de llinguaxe d'intelixencia artificial entrenáu específicamente n'español y, por supuesto, nes llingües oficiales, y en códigu abiertu y tresparente". Poro, l'asturianu taría escluyíu d'un proyeutu de tal envergadura.

Sánchez anuncia un proyectu "n'español y, por supuesto, nes llingües oficiales"

Los modelos de llinguaxe requieren corpus masivos de datos lingüísticos, si bien el porcentaxe de recursos n'inglés alcanza hasta'l 90 por cientu en munchos de los sistemas actuales. La iniciativa nueva, pionera a nivel europeo, busca proporcionar una infraestructura llingüística abierta, pública y accesible pa les empreses, de forma que puedan disponer d'un modelu de llinguaxe de gran escala, entrenáu en castellanu y llingües cooficiales, que facilite servicios en teunoloxíes del llinguaxe pa que puedan desarrollar aplicaciones avanzaes pa la so esplotación económica posterior, como asistentes intelixentes, sistemes conversacionales y de diálogu o modelos de xeneración de conteníu.

Semeya obra de Pool Moncloa/Fernando Calvo.