L’asturianu, ausente nes prebes d’accesu a la TV autonómica

Ta acabante d'asoleyase en BOPA la convocatoria pa cubrir les 20 primeres de les 84 places de la plantiya de la TV autonómica. L'informe del Institutu d'Alministración "Adolfo Posada" que proponía que l'asturianu nun tenía por que ser esixible nin necesario pa cubrir puestos na TV resultó determinante nes decisiones de los responsables de los responsables del énte y asina'l conocimientu del asturianu nun apaez como requisitu pa nengún de los puestos que se ficieron públicos güei, que son los de Técnicos de Rellaciones Corporatives, Técnicos de Xestión y Técnicos d'Antena y Conteníos.

La única referencia a la llingua en toles places convocaes güei vien nun puntu xenéricu del temariu de los aspirantes a cubrir puestos d'antena y conteníos como "característiques sociolingüístiques d'Asturies" un enunciáu que nun compromete a los aspirantes a precisar de conocimientos demostrables d'asturianu, más únicamente tener unes nociones de sociollingüística.

La única llingua oficial que contempla l'ente ye la castellana, viéndose obligaos los aspirantes d'otres nacionalidaes que nun sean la española a facer una preba que demuestre'l so nivel de conocimientu de la llingua castellana, anque una de les prebes que van tener que pasar va ser la de facer una entrevista personal oral que tendrá de desarrollase n'inglés o en Francés, acordies cola preferencia del opositor.

El BOPA de mañana xueves ha asoleyar el restu de les places, ente elles les de los redactores de multimedia y les de técnicos de mantenimientu, esplotación y realización.
Ver la convocatoria en BOPA