L'asturianu, arrequexáu nes prebes d'accesu a la TV asturiana

L'Ente Públicu de Comunicación del Principáu va convocar oficialmente mañana al traviés del Boletín Oficial del Principáu d'Asturies (BOPA) les prebes de selección pa cubrir un total d'ochenta y cuatro puestos de trabayu de la plantiya de la empresa. Los exámenes van entamar el 15 de setiembre y los puestos a cubrir correspuenden a 39 de la estaya técnica, 25 a la de redacción multimedia, 13 a la d'antena y conteníos, 6 a la estaya de xestión y recursos humanos y una pa rellaciones corporatives. Nos tribunales que decidan el resultáu de les prebes va haber espertos del sector audiovisual y profesores universitarios amás d'un funcionariu de l'Alministracón autonómica y un representante sindical.

El procesu selectivu va mandase pola Llei de Medios de Comunicación Social, que diz que la convocatoria va tener qu'axustase "a principios d'igualdá, méritu, capacidá y publicidá" y nel procesu d'esbilla del personal va contase cola ayuda de la Dirección de Recursos Humanos de Radiotelevisión Española, l'Institutu Oficial de Radio y Televisión y l'Institutu Asturianu d'Alministración Pública Adolfo Posada.


En caún de los puestos a cubrir van pedise conocimientos específicos, pero lo que rescampla ye'l fechu de que l'asturianu nun va contar ente los conocimientos xenerales qu'han tener los trabayadores de la RTVAS pa cubrir nengún de los puestos. A falta de conocese tolos puntos de la convocatoria oficial, dende va dellos díes ye pública la esistencia d'un informe del Institutu d'Alministración Pública Adolfo Posada que diz testualmente que'l conocimientu del asturianu "nun ye imprescindible nin tampoco necesario" pa desempeñar puestu nengún nel Ente públicu de comunicación. La conclusión del informe del Adolfo Posada vien a da-y más gravedá a les declaraciones del director del Ente, Pérez Ornia, que yá declarare nel so día que l'asturianu diba puntuar tolo más a títulu de conocimientu complementariu.