L’asturianismu despidió a Mánfer de la Llera

Vicente García Oliva, Amelia Valcarcel, Xuan Santori y Toli Morilla llevaron alantre un cenciellu actu cívicu de despidida al escritor énte un salón d'actos que quedó pequeñu p'acoyer la ceremonia, que contó tamién cola aportación del Coru d'El Llano.

Cientos de persones pasaron a lo llargo de la tarde del miércoles y el día d'ayeri pel tanatoriu de Cabueñes en Xixón pa dar el pésame pol fallecimientu de Manuel d'Andrés Fernández, decanu de los escritores n'asturianu y militante históricu del asturianismu. Les exequies pol veteranu escritor, que morrió'l pasáu la madrugada del pasáu martes víctima d'un cáncanu pal que nun hebo cura posible, remataron ayeri con un actu civil na capilla del tanatoriu de Xixón nel que l'escritor Vicente García Oliva actuó de mayestru de ceremonies y nel que xubieron a falar l'escritor Xuan Santori y Toli Morilla, que lleeron dellos poemes del desapaecíu Mánfer, y la filósofa Amelia Valcárcel, que fexo un retratu de la vida del últimu presidente de Conceyu Bable, destacando'l so amor pola tierra y l'amistá y el respetu que tuvo siempre Mánfer de la Llera dientro y fuera del asturianismu, un respetu y un reconocimientu que s'espeyaron na presencia nel actu d'una gran cantidá d'amigos y conocíos que dexaron pequeñu'l salón d'actos del tanatoriu. Autoridaes como'l Conseyeru de Xusticia Javier Valledor, que llamentó que Mánfer morriere "ensin ver la tierra prometida de la oficialidá" espresaron tamién el so duelu pol autor, que yera tamién miembru de l'Academia de la llingua Asturiana, representada nel actu pola so presidenta Ana Cano.

L'actu foi curtiu por deséu espresu de la familia, anque Vicente García oliva anunció que Mánfer diba tener un actu d'homenaxe y alcordanza nes condiciones que merecía pa más en p'alantre. Les sos povises reposen agora nel so Llangréu natal.