L'Arribada echa'l piesllu en Xixón

El Centru de Cultura Antiguu Institutu va acoyer esti sábadu 22 de setiembre la última xornada de l'Arribada 2007, que va entamar ya de mañana cola presentación del llibru "Cancioneru líricu asturianu de güei", de Vicente J. Sánchez García, a les 11:30 hores.

Tamién esta mañana va presentase la obra "Historia y cuentos de tradicional oral: María Isabel ya Celestina" de Xosé Ambás (12:00 hores) y va celebrase una mesa reonda sobre la promoción de la lliteratura asturiana nos medios de comunicación, na que van intervenir Ramón Lluis Bande, Rubén Cienfuegos, Próspero Morán, Xurde Morán, Xandru Martino Ruz y el director d'Asturies.com Fernando de la Fuente.

Pela tarde, a les 5, va tener llugar la presentación del proyectu Araz Llibros, col que la casa matriz d'esti diariu electrónicu va abrise al terrén editorial colos sos trés primeros títulos. Otres presentaciones de la tarde van ser la de la "III Antoloxía de cuentios curtios El Garrapiellu" (18:00 hores); "Na solombra del silenciu", de Sabel de Fausta (18:30 hores), y "Na estación de los relevos", de Xosé Bolado (19:00 hores).

El debate de la tarde va partir de la comunicación de Sixto Cortina "Identidá y lliteratura, un averamientu al ensayu políticu" y nelli van participar Lluis Xabel Álvarez, Luis Arias Argüelles-Meres, Ignacio G. López-Dóriga, Javier Neira, Pablo Rodríguez Alonso y Faustino Zapico.

Ya de nueche Sala Albéniz de Xixón va ser l'escenariu de la sesión de clausura de l'Arribada 2007, entamando a les 21:30 hores una sesión especial que va incluyir el III Certame de Monólogu Modernu y actuaciones musicales.