L’Arribada 2007 va celebrase del 14 al 22 de setiembre

Dempués del trunfu de la primer edición celebrada nel añu 2006, l'Arribada lliteraria, el certame cultural entamáu pola iniciativa del escritor Humberto González en Xixón prepárase pa una nueva edición 2007 pa la que les persones que tán tres d'esti eventu van reforzar la parte organizativa y tamién l'estoyu d'artistes convidaos.

Según espliquen los responsables de l'Arribada, el certame quier afitase nesta segunda edición, que va facese del 14 al 22 de setiembre como un congresu onde aconceyen escritores, editores, periodistes, estudiosos de la llingua y la lliteratura, y tamién como un espaciu onde la ciudadanía va participar de les actividaes. Ente les novedaes previstes ta la presencia d'un total de 50 creadores convidaos d'otres comunidaes autónomes o de fuera del estáu.

Pa esta segunda edición, la secretaría técnica qu'organizare l'eventu l'añu pasáu aftóse llegalizándose como Asociación Cultural l'Arribada. Inaciu Galán ye'l presidente d'esta asociación que tien de segundu al escritor Xosé Nel Riesgo y de secretaria a María Teresa González, faciendo de vocales Rubén Cienfuegos, Roberto González, Boris Pontón, Iris Díaz y Humberto González, mientres que les funciones d'ayalgueru correspuénden-y a David Rivas.