L’Antroxu d’Avilés recupera otros dos personaxes tradicionales: El Follosu y El Gruñu

|
El Follosu, El Gruñu y Pepe Venancia Antroxu tradicional Avilés

El Coleutivu Abillés Antroxu Tradicional sigue col so enfotu de recuperar personaxes que formaben parte d’esta celebración n'Avilés va 80 años. Depués de La Vieya y El Cornelu agora presenten a El Follosu y El Gruñu, descritos tamién por Pepe Venancia’l de Miranda.

El Follosu vien a significar en bron, xíriga de los caldederos d’esti llugar avilesín, “el de les fueyes”. La so indumentaria, según cuenten las fontes orales consultaes por esti coleutivu, “consistía principalmente nuna base de sacu cubierta de fueyes de panoya con dalgún otru elementu decorativu de la panoya como los granos de maíz o los tarabucos (parte central dura y ensin granu de la panoya)”.

Nesi sen, espliquen que “anguaño entovía pueden vese cuasi en plenu centru d’Avilés, como en Gaxín, importantes plantaciones de maíz y que “pal Antroxu rural utilizábense les coses que teníen na casería: sacos, teles, pieles, cuernos, ropa vieyo y elementos de la naturaleza”. “Esti tipu de mazcaritos de calter más rural y popular yeran pícaros y provocadores” y El Follosu “solía socatrar a la xente tirando-y granos de maíz”, amás de llevar “una caña de maíz o narbasu con fueyes a mou d’escobón pa metese cola xente, lo que fai que se-y conoza tamién col nome d’El Narbasu”.

El traxe que viste’l recuperáu Follosu ye obra de María Concepción Díaz Fernández, madre del Colexu Públicu Marcelo Gago, qu’esta mañana lu recibió pa preparar l’Antroxu que ta a piques d’arrancar. Pa ello basóse na información aportada por miembros del Coleutivu Abillés y del etnógrafu Alberto Álvarez Peña.

Un gochu

El Gruñu ye otru de los personaxes recuperaos del Antroxu Tradicional. “Munches de les mazcaraes asturianes tienen como bestia de la naturaleza al osu. Sicasí, n’Avilés los informantes faen referencia a El Gruñu o gochu”, rellaten.

Ésti lleva “ropa de sacu, cubierta de trozos de piel curtida, manches prietes y mázcara de gochu asturcelta” y ye “un personaxe que cuerre detrás de la xente, abrázala y dacuando inclusive pue facela prisionera tirándola al suelu”. Acompáñau El Manate, que “en bron significa l’amu”.

El Coleutivu Abilés recuerda que n’Avilés celebrábase nel Llunes el Gordu la rifa’l gochu, “que xunía a burgueses y plebeyos, que participaben xuntos nel sortéu”, de calter benéficu. La responsable de la ellaboración del traxe d’El Gruñu foi Águeda Rey.

Visita en reconocimientu al informante

Estos dos personaxe, xunto con La Vieya y El Cornelu, van acudir mañana a la residencia de mayores d’El Quirinal pa participar na Fiesta del Antroxu. Nella vive Venancia, de  94 años, persona que más información apurrió pa la recuperación d’estos elementos del Antroxu Tradicional avilesín.

Otra manera, los miembros del Coleutivu Abilés quieren agradecer “el so esfuerzu y implicación personal” a toles persones que tán participando en la recuperación del Antroxu Tradicional, asina como al Conceyu d’Avilés, “que desde l’entamu ta collaborando y sofitando esti importante proyeutu de recuperación del nuestu patrimoniu cultural inmaterial”.

Na imaxe, El Follosu y El Gruñu xunto con Venancia.

Contador Estadistiques