L’ampliación del Belles Artes, pendiente de llicitación llueu del preste del Conseyu de Patrimoniu

|
Infografía ampliación del Muséu de Belles Artes d'Asturies

Nes selmanes próximes va salir a llicitación l’ampliación del Muséu de Belles Artes d’Asturies. El Plenu del Conseyu de Patrimoniu Cultural d'Asturies dio’l preste esti miércoles al proyeutu que completa'l del añu 2015 y que consiste nun edificiu de planta nueva apegáu al palaciu del Palaciu de Velarde que va coneutar los dos esistentes anguaño.

L’inmueble va contar con 1.838 metros cuadraos construyíos que se distribúin ente dos suétanos, planta baxa y trés altures. Va agospiar un salón d’actos na planta baxa, el taller de restauración d’obres na primera, les oficines y dependencies alministratives nel segundu pisu y, finalmente, na tercer planta, con vistes a la catedral d’Uviéu, la tienda del muséu y la cafetería.

El proyeutu aprobáu esta mañana pol Conseyu de Patrimoniu sufrió variaciones respeuto a la versión primera p’adaptase a les necesidades que l’apertura y funcionamientu de la primer ampliación reveló a lo llargo d’estos años. Diseñáu pol arquiteutu Patxi Mangado, la primer fase inauguróse nel 2015.

Asina, camudóse l’allugamientu orixinal de la tienda y la cafetería p’aprovechar la esceicional visión esistente de la ciudá nel puntu más altu del edificiu. Amás sustituyóse y amplióse’l tamañu del montacargues previstu de primeres pa poder facilitar los trabayos de tresporte de pieces y materiales, modificaciones entrambes que supunxeron una reordenación d’usos y criterios estructurales en toles plantes.

Una vegada algamáu’l preste del Conseyu de Patrimoniu Cultura, la Conseyería de Cultura, Política Llingüística y Turismu tien en previsión llicitar les obres pa la so construcción nes selmanes próximes.

Eliminación del añadíu

Esta iniciativa trata de recuperar, na midida de lo posible, la fachada del Palaciu de Velarde, tapada nel so día col añadíu qu’agora va ser elimináu. Ye una ampliación anexa al palaciu que se fixo nos años 60 y ocultó de manera cuasi íntegra la fachada norte.

Ésta va ser la parcela qu’ocupará l’edificiu nuevu, que lliberará un espaciu nel llateral del inmueble, xenerando una cai interior que permita, amás de la incorporación de lluz natural, poder apreciar les traces del palaciu como se concibió n’orixe. La estratéxica situación del edificiu nuevu, ente les dos partes espositives del muséu, va asegurar un accesu fácil y una división eficaz ente los usos públicos y privaos de serviciu.

Contador Estadistiques