L'ALLA reclama la presencia del asturianu na TV

L'Academia de la Llingua Asturiana, al traviés del so cartafueyu periódicu "Les Anuncies" fizo públicu un asitiamientu de la institución sobre la presencia del asturianu na TV autonómica. L'ALLA llamenta que dende l'añu 2003, en que l'Academia y otres instituciones amosaron el so paecer sobre'l particular na Xunta Xeneral del Principáu, mientres se discutía la Llei pola que diba mandase l'Ente "nun se tomare determín políticu sobre esti asuntu".


La institución afirma que'l so paecer sobre la presencia del asturianu na RTPA tamién-y lu tresmitió a los responsables del Ente tres de la so constitución formal, y camienta que ye preciso volver a asoleyar la so postura pública sobre ello. En concreto, les esixencies de l'ALLA parten de que la TV autonómica "ha vertebrar territorial y culturalmente Asturies" valiendo de "instrumentu eficaz pa la recuperación y espardimientu del idioma". L'ALLA tien pa ella qu'asturianu y castellanu han tratase nun planu d'igualdá, pa lo que l'asturianu habría tener como mínimo un 50% del tiempu d'emisión ensin discriminaciones nos horarios nin nes temátiques de los programes. L'ALLA pide que la presencia del asturianu sía "mayoritaria" nel portal d'internet y radio del Ente autonómicu.