L'ALLA entama esti miércoles los Alcuentros Internacionales de Llingua Minoritaria y Educación

L'Academia de la Llingua Asturiana entama esti miércoles 29 na Escuela Universitaria de Maxisteriu. los XI Alcuentros Internacionales de Llingua Minoritaria y Educación, que van desarrrollase hasta'l 31 de marzu .

Los alcuentros van entamar a les 18:00 cola conferencia: de Christian Puren, de la Université Jean Monnet de Saint-Etienne (Francia) que va falar sobre "Enseñanza de les llingües dende l'enfoque comunicativu hasta la perspeutiva aicional". Una comunicación de Xulio Berros col títulu "Lleendo y navegando col asturianu" va dar pasu a la gran conferencia del día, a cargu de Celia Romea (Universitat de Barcelona) entitulada "El cine como recursu didáuticu nos deprendizaxes llingüísticos".

Alie Van der Shaaf, collaboradora de Mercator Education: European Network for Regional or Minority Languages and Education, va entamar la xornada del xueves falando de "Educación bi/trillingüe n'Europa" mientres que Loreto Díaz, de la Universidá d'Uviéu, va falar de "Tratamientu didáuticu del vocabulariu de la llingua asturiana" pesllando'l día la conferencia de Joaquim Dolz (de la Université de Genève) "Delles estratexes didáutiques na enseñanza d'una llingua minoritaria".

La xornada de pieslle del vienres 31 va entamar cola ponencia del Especialista en Filoloxía Asturiana Xandru Martino Ruz "Música asturiana y llingua asturiana: una interrellación didáutica". Darréu d'ello, la profesora de fala eo-naviega Ruth González tien preparada una comunicación sobre "As isoglosas nel Navia-Eo: recurso metodolóxico nas clases de fala". Les xornaes van poner el piesllu con una conferencia de Fernando Padilla, qu'ocupa'l cargu d'asesor Téunicu Docente de la Conseyería d'Educación y que va esplicar l'estáu actual y plantegamientos de futuru de la llingua asturiana nel sistema educativu.