L’ALLA diz que la TV asturiana ta pensada pa cualquier llugar menos p'Asturies

Les reacciones a la convocatoria d'emplegu pal Ente autonómicu, na que l'asturianu nun apaez ente los requisitos pa los sos futuros redactores, nun tardaron en producise. Academia de la Llingua y Periodistes pol Asturianu emitieron ayeri durísimos comunicaos

L'Academia de la Llingua Asturiana foi la primera en reaccionar, con un comunicáu en que "llamenta que na convocatoria acabante de places pa periodistes y téunicos de la futura radiotelevisión asturiana nun haya referencia esplícita nenguna a la conocencia de la llingua asturiana" L'ALLA sorraya que, en contra d'esto, "si que va ser imprescindible'l dominiu de llingües estranxeres" en referencia a la preba obligatoria y eliminatoria a realizar polos aspirantes n'inglés o francés conque, evidentemente, "nun son llingües oficiales d'Asturies". Por too ello, pa l'ALLA, el camín escoyíu pa la futura radiotelevisión asturiana lleva "a construir un mediu de comunicación que podía mesmamente emitir en cualquier sitiu del mundu que nun fuera Asturies, marxinando de los sos conteníos y de les sos formes d'espresión a la cultura asturiana y dexando de llau a los escelentes profesionales que dende hai años trabayen por Asturies y pola so cultura" L'ALLA sorpréndese de ver que nenguna radiotelevisión autonómica llevó a cabu "una seleición de personal que refugare tanto la cultura propia" mientres que en toles demás autonómiques "hai un respetu pola llingua que dende la direición d'esta radiotelevisión que se diz asturiana nin se tien nin se quier tener". Pa l'ALLA, que pide que se reconsideren estos criterios d'almisión de personal, esto supón un pasu más d'un gobiernu depués de casi tres años "de falses promeses y mentires dexa claro que nun tien la más mínima intención de respetar a la llingua y que toles sos declaraciones en favor de "potenciar" l'asturianu o "normalizar" el so usu nun son más que pallabres vacíes"

Pela so parte, el colectivu Periodistes pol Asturianu declaró tamién nuna nota de prensa que "esta TV nun va representar a Asturies" considerando "inalmisible'l fechu de que nenguna de les places de redacción, antena y conteníos convocaes ayeri contemplen un mínimu conocimientu d'asturianu como requisitu p'acceder a exercer como periodista nel Ente Públicu". Pa Periodistes pol asturianu, la presencia de la preba d'inglés ye tamién un puntu que rincha especialmente, sacando en conclusión del perfil de la convocatoria que'l procesu de selección de personal "persigue una TV monollingüe y aldeana incapaz de representar la realidá asturiana". L'Asociación de periodistes diz tamién que'l fechu de marxinar l'asturianu nos criterios de selección de personal supón una violación de los mesmos estatutos de la TV, neto que va contra l'espíritu del Estatutu d'Autonomía y contra la Llei d'Usu. El colectivu profesional llama l'atención tamién sobre la contradicción ente lo que fai l'Ente y lo que manden el Pautu de Gobiernu y el Plan de Normalización del asturianu, pidiendo que s'asuman les responsabilidaes polítiques correspondientes. Periodistes pol Asturianu llamenta finalmente l'oscurantismu nel procesu de cración de la Tv autonómica, que diz que se ta llevando alantre d'espaldes a una sociedá que nun sabe qué funciones van tener estos medios de comunicación de titularidá pública.