L’ALLA denuncia “l’intentu de galleguización” del occidente asturianu

L'Academia de la Llingua Asturiana dio esta mañana una rueda de prensa na qu'alvirtió de la so "preocupación" pola esistencia d'un plan de normalización ellaboráu pola Xunta de Galicia esti mes des setiembre que preve actuaciones nel Navia-Eo, onde'l plan defende que se fala gallego y propón delles midíes pa la so normalización.

La Presidenta de l'ALLA, Ana Cano, Miguel Ramos Corrada y Xosé Antón González Riaño esplicaron a los medios de comunicación que los planes normalizadores del gallegu de la Xunta de Galicia incluyen actuaciones nel esterior coles que nun tan d'alcuerdu dende la institución llingüística d'Asturies. Según esplicó l'ALLA, la Xunta de Galicia aprebó'l 22 de setiembre un "Plan Xeral de Normalización" qu'incluye actuaciones sobre lo que se define como "gallegu esterior" ello ye, les fales del Navia-Eo n'Asturies y de parte de la fastera d'El Bierzo, en Llión, de Zamora y del norte d'Extremadura. Ente estes actuaciones ta l'enxertamientu del gallegu nos centros d'enseñanza de primaria y secundaria y oficializar o, a lo menos, allegar l'estatus llegal del gallegu a la oficialidá nestos territorios. Los medios de comunicación tamién entren nel plan gallegu, que pide la meyora de la cobertura de la señal de la canal de TV autonómica gallega nestos llugares, amás de qu'esta canal dedique más programación específica a les noticies del Navia-Eo. La creación d'un posible selmanariu en gallegu pal Navia-Eo tamién entra nes perspectives del plan

El documentu gallegu, que se refier al Navia-Eo como "un territoriu históricu de la Gallaecia qu'actualmente pertenez a la provincia d'Uviéu" parte de la base de qu'hai qu'esplicar y convencer a la población de la zona de que lo que falen ye gallego, y non otra cosa y de que viven nun territoriu "de cultura galega". Una d'estes midíes pasa por esplicar a los padres d'estudiantes de la conveniencia de que los rapacinos deprendan gallego y s'eduquen nello con vistes a una posible "carrera profesional en Galicia". Nesti sentíu, el programa, yá aprobáu pola Xunta de Galicia y espublizáu nel Boletín Oficial del Parlamentu de Galicia prepara'l camín per otra vía al solicitar que "tolos enseñantes de cualquier asignatura puedan impartir les sos clases en gallegu, con vistes a preparase pa un eventual accesu a la enseñanza superior nes universidaes gallegues"

Los representantes de l'ALLA defendieron l'asturianidá del Navia-Eo, avalada pola encuesta sociollingüística de Llera Ramo y esplicaron que pa l'Academia asturiana'l Navia-Eo ye una zona con "una variedá llingüística con entidá propia, el Gallego-asturianu, que tien que ser oficial en paralelu y en términos equivalentes al asturianu".

L'ALLA dio anuncia de que va tomar cuantes midíes seyan necesaries pa torgar lo que considera un "intentu de galleguización del occidente asturianu" y la mesma presidenta de la entidá faló de qu'hai que trabayar "pa que nun pasen un milímetru del Eo p'acá". L'ALLA vese llexitimada pa facer esti llabor d'oposición al plan gallegu en cuantes que los sos estatutos especifiquen que "l'Academia de la Llingua ha promover y velar pol gallego-asturianu o astur-galaicu". Por de pronto, l'ALLA unvió una carta de protesta al Presidente asturianu Álvarez Areces y otra al presidente de l'Academia de la Lengua Galega, Xosé Ramón Barreriro, dambes ensin rempuesta pel momentu.

D'otra manera, y cambiando de tema, la presidenta de l'Alla refirióse al cume sobre la llingua castellana en Rosario (Arxentina) nel que'l presidente de la RAE García de la Concha fizo referencia al llabor de l'ALLA. Según esplicó Ana Cano, l'ALLA nun recibió invitación de la Real Academia Española de la Lengua p'asistir al congresu de Rosario, cosa que sí fizo con otres academies de llingües del estáu como la catalana o la vasca