L'Alianza Unida Iraquí gana les elecciones n'Irak

La llista chií foi la que más votos recoyó, anque quedóse a les puestes de la mayoría absoluta col 47,6 % de los votos.

L' Alianza Unida Iraquí (AIU) ta considerada yá como la ganadora de les elecciones que se celebraron el pasáu 30 de xineru n'Irak. La llista del l'alianza taba compuesta na so mayoría por chies confesionales, anque tamién había otros grupos como cristianos, sunnies o Kurdos. L'AUI apaeció de mano como la favorita nestes elecciones, sobre too pol sofitu que da a esta formación l'ayatolá Ali Sistani. Anque llegó a pensase que la llista de l'Alianza podía llegar al 60 % de los votos, a la fin quedaron nun 47,6 %, qu'obliga a l'AUI a buscar aliances pa poder sacar alantre los sos proyectos, asina como pa nomar un presidente y un primer ministru.

Les formaciones coles que va tener qu'entendese los ganadores de les elecciones son por exemplu la segunda llista más votada, la llista Unida Kurda, qu'agrupa a los principales partíos kurdos, y que recibieron 2,5 millones de votos, ye dicir, el 25,7% de los votos. En tercer llugar ta la llista na que taba'l primer ministru saliente, Iyad Alaui, de corte chií laico, qu'algamó 1.168.000 votos, un 13,8% del total. La llista del presidente saliente, el suní Ghazi al-Yaouar, quedó en cuarta posición con 150.680 papeletes (el 1,7% del total).

Una de les grandes preocupaciones nesta convocatoria yera'l nivel de participación de la población nunes elecciones que se celebraben nun ambiente realmente complicáu, y que pa munchos nun cumplíen coles condiciones mínimes de llibertá y seguridá pa celebrase. A la fin, y según la Comisión Electoral Iraquí, la participación llegó a un 59 %.

Más información en :

CNN, BBC, AL Jazeera, Liberation, La República, The Guardian.