L’AIDLCM diz que nun-y val el Plan de Normalización

L'Asociación Internacional pa la Defensa de les Llingües y Cultures Minoritaries (AIDLCM) aconceyó esta selmana en Miranda do Douro (Portugal) onde celebró'l so congresu añal. El fechu de que la xunta de la organización se celebrare precisamente nun llugar onde ta oficializáu'l Mirandés, una variante del asturianu, llevó a que los espertos de l'AIDCLM prestaren atención especial al asturianu nes conclusiones d'un congresu al qu'asistió en representación de l'Academia de la Llingua l'antropólogu Roberto Quevedo.

Les conclusiones de la organización internacional no tocante al asturianu centrárose na valoración del Plan de Normalización del Asturianu y na enseñanza. De lo primero, l'AIDCLM denunció que, con reconocer qu'hebo dello d'avance na normalizaciój del asturianu, el plan de normalización qu'aprebó'l parlamentu asturianu nun garantiza la supervivencia de la llingua por ser curtiu d'oxetivos y nun dar categoría llegal pa normalizar realmente la llingua propia de la sociedá asturiana.

L'AIDCLM califica tamién nes sos conclusiones de "difícil" la situación pela que pasa l'asturianu, sobremanera nel ámbitu de la enseñanza. Por ello, l'asociación considera "imprescindible" que s'universalice la ufierta d'asturianu en tolos niveles de la educación asturiana, reclamando igualmente la estabilidá del profesoráu de llingua y la declaración d'oficialidá del asturianu.