L'agua estropió'l Día d'Asturies

L'agua estropió la celebración del Día d'Asturies, marcáu pola participación d'IX-BPA n'actos alternativos a los oficiales.

El Presidente asturianu Vicente Álvarez Areces, que participó xunta l'arzobispu Carlos osoro de los actos oficiales de la fiesta relixosa que se desarrollaron en Cuadonga, dio un mensaxe oficial que, baxo'l títulu "La fuerza de una identidad colectiva" fuxó de cualquier referencia concreta a la realidá asturiana del momentu y centróse sobremanera en valores abstractos como l'esfuerzu común de tolos asturianos, la ilusión y el valor de la convivencia. La vixencia del Estatutu d'Autonomía xunta la Constitución Española y la madurez que demuestra l'asunción de competencies por parte de la comunidá enllenaron el restu del mensaxe del Presidente, que se refirió a la converxencia d'Asturies con España y con Europa y fizo promeses xenériques con vistes a la llexislatura acabante d'entamar en materia de vivienda y trabayu, anunciando'l plenu emplegu como meta.

Ente los actos alternativos que se desarrollaron esti 8 de setiembre, la manifestación convocada por IX-Bloque por Asturies en Xixón foi, con ser l'actu más concurríu, un relativu fracasu al nun ser a axuntar más d'unes 500 persones pa desfilar lloviendo per Xixón, momentu que recueye la imaxe qu'acompaña esta información. La condición d'IX-BPA como fuerza nel gobieru y, al mesmu tiempu, organizadora d'actos críticos cola llinia del executivu, obligó a aselar los discursos que se lleeron al acabar la demostración pública, dexándonse aparte les crítiques abiertes a la FSA-PSOE que marcaren esta mesma manifestación l'añu pasáu. El discursu más suave nesti sentíu foi el de F.J. Valledor. El Conseyeru de Xusticia faló de los cambeos que ve que tan dándose nel PSOE, al que quixo dar un votu de confianza. Na mesma llinia tuvo'l secretariu d'IX, Jesús Iglesias, quien evitó tou enfrentamientu colos socios de gobiernu afirmando que la manifestación d'IX-BPA y los actos oficiales yeren "espresiones distintes de la realidá asturiana". Menos blandu foi Rafael Palacios, del BPA, quien dixo en referencia al alcuerdu de gobiernu que "esti ye un pactu de mínimos que nun nos obliga a renunciar a nada".

Otramiente, Andecha Astur celebró la tradicional manuifestación que fai n'Uviéu, axuntando a daqué menos de 200 persones baxo'l lema "faciendo país ensin pautos vergoñosos". La organización nacionalista aprovechó la fecha pa presentar el "Manifiestu de Cuadonga" un documentu de denuncia sobre la situación del país. Pela so parte, los militantes del PAS ficieron un pequeñu actu en Cangues d'Onís y Izquierda Asturiana fizo una xinta pa militantes y simpatizantes en Sebares.

Sicasí, la xornada vieno tamién marcada pola esplosión, la nueche del sábadu, de dos aparatos caseros fechos con bombones de gas y lates de gasolina que dañaron la sede del PP en Sotrondio y la del PSOE nel Infiestu, mientres que na sede d'Izquierda Xunida en Xixón quemaron una cubierta de goma, dañando la puerte del local. Nos tres llugares apaecieron pasquinos con mensaxes independentistes y la frase "Asturies nun se vende".