L'adiós del primer alcalde asturianista

Nestos meses de precampaña electoral en que partíos y agrupaciones van pesllando llistes con vistes a les elecciones autonómiques y a conceyos del 25 de mayu, Xulián Fernández Montes, primer alcalde asturianista de la historia, diz que dexa la política. La noticia, que yá sabíen de va meses los compañeros d'agrupación del alcalde de Nava, garra de sospresa al asturianismu y val pa facer un repás de doce años d'asturianismu políticu, que son los que'l veteranu rexíor lleva nel ayuntamientu. Xulián Fernández salió conceyal por primer vez nes elecciones de 1991. Naquel añu l'asturianismu presentose xuntu gracies a la coalición PAS-UNA, que dio bonos resultaos pero qu'acabó como'l rosario l'aurora al romper los alcuerdos ente dambos partíos. Como'l PAS tenía los más de los cargos electos, ente ellos l'acta de diputáu na Xunta Xeneral del so líder, Xuan Xosé Sánchez Vicente, la UNA nunca nun se recuperó del guelpe y acabó por disolvese. Como conceyal del PAS, Xulián pasó esta primer llexislatura, de color socialista, col cargu de teniente d'alcalde. Con esto y colos sos anicios políticos nos 70 como militante del PSP de Pedro de Silva podría paecer lóxico que, cuando nel 95 PP y PSOE empataron a 6 conceyales Xulián ficiese de llave pa da-y l'alcaldía al PSOE o que como muncho s'astuviere, pero Xulián sosprendió al conseguir que los conceyales del PP lu votaren a elli d'alcalde, repitíendose en Nava una situación semeya a la de la Xunta Xeneral del Principáu, onde'l votu de Sánchez Vicente valía pa sacar alantre los presupuestos del PP. Durante esta primer llexislatura, Fernández Montes aprovechó la disponibilidá de fondos pa facer de Nava centru d'atención de tola fastera centro-oriental d'Asturies. Nel contestu de despoblamientu de los conceyos pequeños, Nava dio munchu suelu pa edificar y foi de los pocos conceyos que crecieron, atropando equipamientos y desarrollando proyectos como'l del Muséu de la Sidra. Otramiente, Nava fízose centru pa los artesanos, impulsándose los mercaos tradicionales, anque quiciás el proyectu en que más s'enfotó'l conceyu foi'l de la Comarca de la Sidra. Pa la llexislatura 99-2003, los asturianistes navetos pañaron l'aprobación de los navetos, convirtiéndose na segunda fuerza del conceyu con 4 edilesla tensión cola dirección del PAS, que fracasare nes elecciones a la Xunta Xeneral, llevó a que l'equipu de Fernández Montes franciere col so partíu. Reforzáu en Nava, Montes repitió mandatu colos votos del PP nuna llexislatura marcada pola crisis interna nel PSOE navetu y na que siguieron afitándose los proyectos de la primera, pero na que nun hebo los mesmos recursos financieros. Agora, con un grupu municipal afitáu pero ensin un partíu que faiga de referente nel país, Xulián dexa'l testigu en manes d'Arturo Redondo, hasta agora conceyal de deportes y tradicional númberu 2 del primer alcalde asturianista.