L'Acesol Voley firmó'l descensu de categoría

L'Acesol Voley La Calzada perdió la categoría na Superlliga Femenina de Voleibol al salir derrotáu nel so partíu escontra l'equipu canariu del Ciudad de Las Palmas por 3-0. L'equipu xixonés disputó esti partíu ensin la so colocadora titular, Maryeling Araújo, que yá fuere baxa nel partíu escontra l'Albacete del otru sábadu por mancadura.

L´equipu asturianu namás plantó cara nel últimu set gracies al llabor de Daniela Da Silva y Vita Prychepa. l'aspectu más destacáu d´esti partíu foi la nula recepción que tuvo l'equipu fabril, que se conoz na cifra de 39 puntos que-y fizo'l rival. L'equipu canariu tuvo más metíu nel partíu dende l'entamu y nun tuvo problemes pa ganar, asina l´Acesol nel primer set yá perdía por 8-4 y 16-9.

Agora l'equipu xixonés alcuéntrase nuna situación difícil enforma, y ello ye qu'al descensu de categoría hai q´amestá-y les graves dificultaes económiques que tien, como cuando la otra selmana tuvo a puntu de suspendese'l partíu escontra l'Albacete poles deldes que tenía la entidá colos árbitrios, llográndose a última hora una prórroga de diez díes pa iguala. Casu aparte son les deldes coles xugadores de la plantiya a les que se-yos deben delles mensualidaes.

Alliniaciones:

C. V. Ciudad de Las Palmas: Isaura Mederos, Elia González, Rebeca Kruse, Selena Baraja, María Cárdenas y Tatiana Encarnación. Tamién xugaron: Sandra Rojas (llíberu), Iskra de la Cruz, Lara Raspall y Sara Cambray.

Acesol Voley La Calzada: Vita Prychepa, Bárbara Rodríguez, Marija Zoric, Janesca Scharnovski, Daniela da Silva y Estafania Sangiao. Tamién xugaron: Noelia Sánchez (llíberu), Noelia Franco y Cristina Pardo.

Árbitrios: Mariola Rodríguez y José María Padrón (Tenerife). Partíu disputáu nel Pabellón Municipal Carlos García San Román de Las Palmas con pocos espectadores.
Parciales: 25-18 (21 minutos), 25-18 (18 minutos) y 25-22 (24 minutos).