L´Acesol enguedeya más les sos posiblidaes de permanencia

L´Acesol Voley La Calzada salió derrotáu del Pabellón de Deportes Fuentenueva nun partíu nel que Universidad de Granada foi superior al equipu xixonés.

Nel partíu, que duró 67 minutos, l´Acesol namás-y plantó cara al equipu andaluz nel segundu set, con un resultáu de 25-21. Esta derrota enguedeya más la permanencia del equipu fabril na Superlliga Femenina, anque la derrota del Ciudad de Las Palmas col Benidorm dexa les coses como taben, a trés victories de la permanencia, que la marca l´equipu canariu, pero con una xornada menos.


El partíu entamó con un primer set igualáu y tres d´un empate a 14 les imprecisiones del equipu xixonés ficieron que l´equipu del Universidad marchare nel marcador y finare'l set con un resultáu de 25-18, en ventidós minutos.
Nel segundu set les rotaciones del equipu granadinu igualaron el partíu y llegóse a un apretáu marcador de 18-17, que desfizo l'equipu local pa pesllar el set con un 25-21, en venticuatro minutos.
El tercer set foi un paséu pal equipu universitariu y nun tuvo color, pues l'Acesol entregóse y perdió'l set por un resultáu de 25-17, en ventiún minutos.
Nel equipu xixonés hai de destacar el llabor fechu, nel segundu set, poles xugadores Maryeling Araújo y Daniela da Silva. Nel equipu local destacó la venezolana Desirée Glod, antigua xugadora del equipu asturianu, que foi la másima anotadora del partíu.

Alliniaciones:

Universidad de Granada: María Frontera, Patricia Aranda, Eva Piatkowska, Sara González, Desirée Glod y Arkia El-Ammari.Tamién xugaron: Ana Ramírez (llíberu), Kele Eveland, Jennifer Mendoza, Clarence Pérez y Aitana Balingha.

Acesol Voley La Calzada: Maryeling Araújo, Vita Prychepa; Bárbara Rodríguez; Noelia Sánchez; Janesca Scharnovski y Daniela da Silva – equipo inicial – Noelia Franco (llíberu); Marija Zoric; Cristina Pardo y Estefanía Sangiao.

Árbitros: José Luis Arrate (colexu valencianu) y Ramiro Riveiros (colexu gallegu). Tuvieron presentes nel Pabellón de Fuentenuva un cientu persones.

Parciales: 25-18 (22 minutos), 25-21 (24 minutos) y 25-17 (21 minutos).