L’Academia de la Llingua reclama Oficialidá na reforma estatutaria

L'Academia de la Llingua Asturiana ta acabante d'asoleyar el que fai el númberu 100 del so cartafueyu informativu "Les Anuncies". Nelli, l'Alla fai una defensa de la presencia de la oficialidá na prósima reforma del estatutu d'autonomía y critica'l llabor del Gobiernu asturianu en materia de política llingüística.

L'Alla, que va facer público d'equí a dientro poco un posicionamientu públicu sobre la manera en que tien d'enxertase la oficialidá nel estatutu reformáu, critica nesti númberu de "Les Anuncies" que dempués del monumental despreciu a la cultura asturiana que supunxo l'anterior reforma estatutaria, la "élite gobernante y alternante" asturiana escoyó "nun dase por enterada" de la esistencia del asturianu" esperando que llegare la "destrucción" del asturianu.

L'Academia reconoz que, anque'l cambéu xeneracional va caltrinado nos partíos "entovía paecen tener abondu puxu los sectores más reaccionarios" y alvierte de qu'empiecen a vese "movimientos de raigañu autoritariu que, mazcaraos de cinismu, quieren perpetuar el modelu cultural franquista n'Asturies". Énte esti contestu, l'Alla ve que la oficialidá ye "una obligación moral", destacando l'agraviu comparativu con otros llugares, l'Alla declara que "nun podemos dexar que la nuestra tierra siga siendo la escepción represiva de los derechos llingüísticos".

D'otra manera, l'Alla condena nesti númberu de "les anuncies" lo que ve que ye "un branu como los de los últimos años" no tocante a política llingüística. L'Alla diz que namás la iniciativa ciudadana ta faciendo dalgo pol idioma mientres vivimos unos meses de "grandes pallabres favoratibles pa la llingua asturiana" coles que se busca "rentabilidá política". Según l'Academia, "a estes altures les pallabres y les promeses nun tienen credibilidá denguna".