L'Academia de la Llingua Asturiana recibe del Estáu 280.000 euros menos que'l restu d'academies

El Gobiernu aumenta la dotación a Euskaltzaindia hasta práuticamente igualala coles instituciones gallega y catalana.

El Conseyu de Ministros celebráu'l martes aprobó'l Real Decretu pol que se regula la concesión direuta de subvenciones per parte del Ministeriu de Ciencia, Innovación y Universidaes a entidades rellacionaes cola investigación y el conocimientu. Esti 2024 nun hai Presupuestos Xenerales del Estáu (PXE) énte la decisión del Executivu de prorrogar los del 2023 y negociar los del 2025, polo qu'ha usase esta vía pa les posibles modificaciones.

L'Academia de la Llingua Asturiana (ALLA) va recibir la mesma cantidá que l'añu pasáu, 50.000 euros, una cantidá que sigue lloñe de la que se tresllada al restu d'academies de les llingües del Estáu. La Real Academia Galega y l’Institut d’Estudis Catalans siguen con 333.170 euros, esto ye, 283.170 más que la institución asturiana.

Mentes, Euskaltzaindia, que l'añu pasáu tenía una partida de 267.500, pasa a contar con 333.000 euros. La concesión inclúi per primer vez al Institut d´Estudis Aranesi-Acadèmia Aranesa dera Lengua Occitana, entidá que va disponder de 30.000 euros.

La Real Academia Española (RAE) continúa con 7.455.330 euros, mentes la Comisión Permanente de la Asociación de Academias de la Lengua Española 89.510. tamién mesma cantidá que nel 2023.

Pidimientu de Xuníes Podemos pa igualar les partíes

Nel 2022 Xuníes Podemos presentara una enmienda a los PXE del 2023 pa equiparar la partida de l'ALLA a la del restu d'academies. Ésta sicasí sólo contó col sofitu de la diputada asturiana de dicha coalición, Sofía Fernández Castañón, col PSOE, PP y Foro votando 'non', mentes que VOX nun exerció'l so derechu.

Del restu de formaciones, optaron pol 'sí' ERC, EH Bildu y CUP. Astuviéronse Mes Compromís, Junts per Catalunya, Más País-EQUO, BNG y Teruel Existe, y tamién s'opunxeron Ciudadanos, EAJ-PNV, PDeCAT, Coalición Canaria-PNC-Nueva Canarias, los dos espulsaos d’UPN y Pablo Cambronero, tránsfuga de Ciudadanos.

Na imaxe, la ministra de Ciencia, Innovación y Universidaes, Diana Morant. Semeya de Pool Moncloa/José Manuel Álvarez.