L'Academia de la Llingua Asturiana entregó los sos premios añales d'investigación

L'Academia de la Llingua Asturiana ta acabante de presentar el
númberu cuatru de los sos "Cartafueyos Normativos", nesta
ocasión dedicáu a "Abreviatures, rotulaciones y propuestes
d'espresión y llocución". La Presidenta de la
institución, Ana Cano, presentó esti volume que sigún les
sos palabres "quier ser una ferramienta útil pa preparar la nuesa
llingua pal momentu de la normalización llingüística".
L'actu de presentación tamién sirvió pa entregar los
premios de l'Academia de la Llingua na so edición de 2007 y pa dar
anuncia de la edición de los galardones del 2008.

Esti nuevu cartafueyu ye "una importane ufierta normativa que complementa
en dalgún sentíu les aportaciones calteníes nos
númberos anteriores y que ha conrtibuyir de mou vidable a afitar los
usos llingüísticos asturianos n'espacios públicos,
aministrativos y cotidianos". El llibru ta separtáu en tres
estayes, una referida a "Principales abreviatures, sigles y
símbolos", otra a "Rotulaciones n'ámbitos
públicos" y una tercera entitulada "Propuestes
d'espresión y llocución" y vien facer el númberu
cuartu de la colección de "Cartafueyos Normativos". Los tres
anteriores taben dedicaos a "La Constitución española y
l'Estatutu d'Autonomía", "Delles propuestes pa nomes de
persona" y "La llingua na Alministración y otros
documentos". Asimesmo Ana Cano anunció próximos
númberos de la serie referidos a términos d'Internet, nomes
xeográficos y terminoloxía científica.

Per otru llau
l'actu de presentación sirvió tamién pa entregar los
premios de l'ALLA correspondientes a 2007, que foron na estaya de recoyida de material toponímico oral pa Inaciu Galán y Marta Carbajal pol so trabayu sobre la parroquia de La Collá (Siero), con accesitas p'Andrea Duque y J Ignacio Santos, Carlos Suari y Xulio Llaneza polos sos trabayos sobre Santiagu d'Aces (Candamu) La Xungarosa, El Pozón y Villalegre (Avilés) y Tolivia (Llaviana). Ermu quedó'l de recoyida oral de léxicu asturianu, mientres que nel d'investigación llingüística'l premiu foi pa Pablo Suárez pol so Diccionariu Politécnicu d'asturianu y hebo accesit pa Xose Arsenio Coto por "L'asturianu, llingua del sieglu XXI". Nel concursu d'investigación sobre lliteratura Ramiro González Delgado llevó los 600 euros del premiu por "la lliteratura grecollatina en llingua asturiana", mientres que'l veteranu Miguel Solís Santos foi'l ganador nel certame de llectures pa rapazos con "Nosotros, los pexes". N'otru de los concursos lliterarios, el de creación, l'entregúin Pablo Rodríguez Medina foi'l premiau con "El Santu". Quedaron ermos los concursos de recoyida de material lliterario oral y de curtios cinematográficos, y repartiéronse accesits de distintos importes nel de recoyida de material lliterario escrito.