La Xunta Xeneral peslló la llexislatura aprobando les lleis de Policíes Locales y de Mediación Familiar

La Xunta Xeneral del Principáu, el parlamentu asturianu, celebró ayeri xueves el so últimu plenu ordinariu hasta en pasando les elecciones del mes de mayu. aprobando les lleis de Policíes Locales y de Mediación Familiar, les caberes d'una llexislatura marcada pol pautu de Gobiernu ente FSA-PSOE y IX-BA, siendo la primer vegada en que fuerces distintes compartieron gobiernu n'Asturies n'actual democracia.

Les tensiones que presidieron la vida del pautu de Gobiernu conociéronse mesmamente na votación d'ayeri, que se desarrolló ente la protesta de los policíes locales, que reclamaben que la llei reconociere'l derechu a la segunda actividá de los axentes. IX defendía l'inxerimientu d'esi derechu na llei, pero la cámara aprobó'l testu tarazando la proposición que saliera de la conseyería de Valledor.

Ello ye que nestos años l'executivu decoalición nun foi a treslladar a la cámara delles lleis que taben apalabraes, casu de la llei del Serviciu de Salú y la de Derechos y Deberes de los Ciudadanos na so relación colos Servicios Sanitarios, la llei de Patrimoniu, les lleis d'Archivos, Museos y Biblioteques, y la de Participación Xuvenil son delles de les que quedaron pa prau xunto coles de la Función Pública, la básica d'Agricultura, la llei de Réxime local, la llei d'Universidá, o la de Protección Ambiental.

Tocante a les lleis aprobaes, de la Conseyería de Xusticia, Seguridá y Relaciones Exteriores salieron les lleis de Procurador Xeneral, Prevención de Riesgos Llaborales y Cooperación al Desarrollu más la yá nomada de Coordinación de Policíes Locales, mientres que de la de Conseyería de Vivienda y Bienestar Social salieron la llei de Salariu Social Básicu, la llei de modificación de Vipasa y la llei de Midíes urxentes en materia de suelu y vivienda, xunto cola aprobada ayeri de Mediación Familiar .

Les conseyeríes d'IX-BA foron les qu'aprobaron más lleis, anque nestos cuatro años tamién se llevaron alantre, dende les conseyeríes gobernaes pola FSA-PSOE, la llei del Parque Natural de Pinubina y La Mesa, la Llei Autonómica de Carreteres, les lleis del Conseyu Consultivu, del Serviciu Públicu d'Empléu, de Comunicación y Publicidá Institucional, d'Estadística, de Montes o la de Sindicatura de Cuentes.

La última sesión de la Xunta Xeneral supón l'entamu de l'acabación de la llexislatura 2003-2007, que va siguir el 13 d'abril cola apaición del decretu que manda disolver el parlamentu. Les elecciones del 27 de mayu alléguense pasu ente pasu. Vota y opina sobre esti tema en Conceyu Abiertu