La Xunta Xeneral d’Andecha Astur llama a Conceyu Estraordinariu pal 14 de marzu

La Xunta Xeneral d'Andecha Astur fizo pública la convocatoria d'un Conceyu Xeneral Estraordinariu pal 14 de marzu. El conceyu, que va tener llugar nel auditoriu "Príncipe Felipe" d'Uviéu, faise "col oxetivu de finar cola riestra de falsificaciones y suplantaciones que vien sufriendo esta organización" según esplica la Xunta Executiva encabezada por Germán Abad y Roberto Holgado. Ello ye que la convocatoria va tener llugar poques selmanes dempués de la que tien puesta, tamién a Conceyu Xeneral Estraordinariu y pal 24 de febreru en Xixón, el grupu encabezáu por Arturu Bermeyu, que llucha pol control de la organización.

La crisis que se vive na organización nacionalista Andecha Astur algama asina un nuevu episodiu mientres s'allega la fecha de les elecciones del mes de mayu, pa les que van ser mui posiblemente les autoridaes les que determinen n'última instancia a quien correspuende la llexitimidá de les sigles del partíu. Asina, Arturu Bermeyu y los sos partidarios tienen convocáu en Xixón pal 24 de febreru un Conceyu Xeneral Estraordinariu, que se fai, según esplicare'l mesmu Bermeyu, "cola intención d'aclariar cuanto primero posible la situación y poder presentase a les elecciones". La situación nun se ve igual dende'l llau de la Executiva del partíu que salíera de l'asamblea celebrada en Candás el pasáu añu 2006, qu'acusa a Bermeyu y otros militantes de "rexistrar un acta notarial falsa na que se ponen ellos mesmos como cabezaleros d'Andecha, cola intención de secuestrar a la organización y apoderase d'ella". La Xunta Executiva qu'encabecen Germán Abad y Roberto Holgado ve tres de la convocatoria del día 24 un intentu de "suplantar a la Xunta Xeneral d'Andecha Astur, que ye la única que pue facer esa convocatoria" polo que decidió, nuna reunión que se celebró'l pasáu domingu, convocar un Conceyu Xeneral Estraordinariu pal 14 de marzu.

La Xunta Executiva salida de Candás sofita a la persona d'Olaya García Rubiera "como llexítima Secretaria Xeneral d'Andecha Astur" y denuncia que los "actos golpistes" del grupu de Bermeyu tuvieron llugar dempués de qu'el Secretariau d'Organización convocare una reunión el 29 de payares de 2006, cola fin de intentar solucionar los problemes internos d'Andecha, una reunión "a la que nun acudieren estes persones".

Dende la Xunta Executiva afírmase que se quier afitar la democracia de base na organización y vese "mui difícil" llegar a un alcuerdu col sector que califica de "golpista", de los que se diz que tan "autoescluyíos d'Andecha Astur como militantes, ya que'l so únicu enfotu a les puertes de unes elleiciones ye "secuestrar a la organización, al traviés del engañu a la sociedá asturiana y a los xueces". La directiva d'Abad y Holgado agradez nel so comunicáu "al candidatu nacional pa les elecciones y a los conceyales d'Andecha'l sofitu recibíu pa garantizar la llexitimidá de la Executiva y el respetu a la voluntá de los militantes".