La Xunta presenta’l cartel del conciertu pola Oficialidá

La organización Xunta Pola Defensa de la Llingua presentó esta mañana'l cartel del XIX Conciertu pola Oficialidá, que va va facese'l sábadu 28 d'abril nel aparcaderu del estadiu de fútbol Carlos Tartiere d'Uviéu, onde la Xunta va instalar una carpa xigante y dos escenarios independientes nos que van dir alternándose les actuaciones de los grupos Tuenda, Llangres, Dulcamara, Lafu y Rebeca Velasco, Toli Morilla, Chalaneru Soundsystem, K-Nalón y Skama la Rede. El conciertu, que va ufiertar más de 6 hores de música n'asturianu, va entamar a les 19:30 y el preciu de la entrada ye de 5€ anticipada y 6€ na puerta.

D'otra manera, la pita, la famosa mascota de la Xunta Pola Defensa de la Llingua, acompañó la selmana pasada al Presidente asturianu, qu'inauguró'l pasáu llunes la rula nueva de Candás. La mascota de la Xunta, qu'esixe la oficialidá nos actos públicos en que participen los miembros del gobiernu asturianu, reapaeció asina a poques feches del entamu de la campaña electoral.

Esta actuación tien llugar pocos díes dempués de que la organización ficiera público qu'un de los militantes de la so agrupación de Tinéu recibiere denuncia por poner n'asturianu los topónimos d'un cartel de carretera a la entrada de Grau. La organización quixo "amosar tol apoyu y solidaridá col nuestru compañeru, y denunciar qu'estes situaciones danse pola imposición n'Asturies d'una toponimia falsiada, afitada en cuenta de la verdadera, col oxetivu de facer desapaecer la llingua asturiana de los nomes de los llugares d'Asturies".