La Xunta pola Defensa de la llingua presentó’l XIX Conciertu pola Oficialidá

La organización cívica "Xunta pola Defensa de la Llingua Asturiana" fizo ayeri la presentación del "XIX Conciertu pola Oficialidá" cita musical y reivindicativa que va celebrase n'Uviéu, na esplanada del Estadiu Carlos Tartiere, el próximu sábadu 28 d'abril a partir de les 19.30h. El cartel incluye a los grupos Skama la Rede, Dulcamara, Llangres, Toli Morilla, K-Nalón, el duu Lafu y Rebeca Velasco y la banda de reggae Chalaneru Soundsystem, prometiendo 8 hores de música n'asturianu en tolos estilos.



Nel actu tuvieron presentes dellos músicos de les formaciones que van tocar desinteresadamente pola causa de la oficialidá de la llingua asturiana, ente ellos Miguel Fernandi, vocalista del grupu Skama la Rede, xunto colos representantes de la organización, qu afitaron que "esperamos qu'esta seya la última vegada que facemos un Conciertu pola Oficialidá lo que quedría dicir que l'asturianu yá algamaría esti estatus llegal".

Les entraes pal conciertu puen consiguise anticipadamente nos locales collaboradores de la organización per toa Asturies al preciu de 5 euros, mientres que na entrada del recintu van despachase al preciu de 6 euros.