La Xunta Pola Defensa de la Llingua píde-yos a los socialistes que tean pol asturianu que “salgan del armariu”

La Xunta pola Defensa de la Llingua Asturiana dio ayeri n'Uviéu una rueda de prensa pa retrucar les declaraciones d'Ana Rosa Migoya, conseyera de Cultura, que calificó la oficialidá del asturianu de "imposición a la ciudadanía". La Xunta denunció lo que-y abulta "cinismu" y aseguró que "tamos asistiendo a la repetición sistemática d'esti discursu de la obligación per parte de los portavoces de la FSA y del Gobiernu asturianu".

La Xunta presentó tamién na rueda de prensa la propuesta del Grupu Parllamentariu Socialista en Congresu de los Diputaos sobre billingüismu nel Estáu español, na que la Xunta diz que "niega dafechu les tesis de la FSA y asegura que la oficialidá representa derechos, convivencia y llibre elección". El documentu, que ta pa pasar trámite parlamentariu nos próximos díes, empondera'l valor de la riqueza y la pluralidá llingüística del Estáu, valora testualmente como "éxitu" el desarrollu de la oficialidá n'aquelles comunidaes onde se da y afirma qu'ello, en cuenta de ser perxuiciu pa la llingua común, el castellanu "actuó en favor d'una dinámica de convivencia llingüística".

Les palabres del documentu, que tien calter de Proposición non de llei, lleven a la Xunta a afirmar que "Los portavoces del Gobiernu Asturianu y de la FSA mienten y saben que mienten al vincular oficialidá con imposición" y entrúguense "por qué los asturianos nun somos merecedores de los derechos que se califiquen de fundamentales pal restu de ciudadanos del Estáu" y "por qué se califica'l reconocimientu oficial de les llingües del Estáu como reflexu de la España real, de la so pluralidá llingúística, y al tiempu se niega la oficialidá de la llingua asturiana", dos cuestiones que, llevaes al ámbitu de les interioridaes de la FSA faen a la organización de defensa del idioma entrugase " si nun hai nel PSOE asturianu naide qu'anteponga la so integridá personal y los intereses d'Asturies a esta política xacobina y antiasturiana" pidiéndo-yos a los militantes, conceyales,alcaldes y diputaos socialistes que tean al favor de la oficialidá que "dean un pasu al frente y salgan del armariu pa enfrentase al criteriu de la minoría que gobierna'l partíu". La Xunta plantega l'hipotéticu escenariu de ver "a los diputaos asturianos del PSOE votando nel Congresu de los Diputaos a favor d'esta proposición, al tiempu que'l PSOE asturianu caltién un discursu diametralmente opuestu pa la nuesa llingua" y quier saber "si los diputaos asturianos del PSOE en Madrid Maria Luísa Carcedo, Álvaro Cuesta, María Monteserín y Celestino Suárez van votar a favor d'esta proposición desautorizando con ello l'argumentación d'Álvarez Areces, Ana Rosa Migoya, Javier Fernández y Fernándo Lastra".