La Xunta pola Defensa de la Llingua llamenta que Consuelo Vega "asuma tan rápido la postura de la FSA" respecto a la oficialidá

Nun comunicáu la Xunta pola Defensa de la Llingua Asturiana diz que "les declaraciones feches al respective de la oficialidá pola Directora Xeneral Promoción Cultural y Política Llingüística, Consuelo Vega, suponen la confirmación del pocu conteníu que va tener esi cargu en manes de daquién que sigue de pe a pa les consignes más conocíes del nucleu duru de la Federación Socialista Asturiana" yá que "vuelve a centrar el debate de la oficialidá non nuna cuestión de derechos ciudadanos sinón na pura y simple aritmética parllamentaria".

Pa la Xunta "cuando la FSA se niega sistemáticamente a dialogar o a buscar consensos sobre la oficialidá cola sida de qu'eso nun ta nel so programa electoral, o cuando identifica los votos a Izquierda Unida colos votos de tolos favorables a la oficialidá, quier dar el mensaxe falaz de que los votantes del PSOE tán en contra de la oficialidá. Eso, como bien dexen ver los estudios sociolóxicos, nun ye verdá, porque l'apreciu a la recuperación del asturianu y a la igualación de derechos colos ciudadanos d'otres comunidaes ye dalgo que comparten votantes de tolos partíos representaos na Xunta Xeneral". La Xunta afirma asimesmo que "Consuelo Vega, coles sos declaraciones, ta confundiendo les élites refractaries de dalgunos partíos colo que ye'l sentir mayoritariu de la sociedá".

Finalmente'l comunicáu califica de "llamentable que cuasi diez años depués d'aprobase la conocida como «Llei del Bable» -que

s'incumple sistemáticamente en cuantes a la enseñanza, medios de comunicación y usu institucional-, la Directora Xeneral Promoción Cultural y Política Llingüística descubra qu'hai «un campu llegal mui grande col marcu llegal qu'existe agora». Tovía más, cuando se-y pregunta polos casos de discriminación llingüística asocedíos a funcionarios qu'usaron l'asturianu nes sos comunicaciones cola Alministración autonómica, refierse a ellos como «casos anecdóticos», nun los incluye ente los derechos reconocíos pola llei y ve difícil formar a los emplegaos públicos pa que conozan l'asturianu. Si esi va ser el plantegamientu d'una persona que diz pertenecer al campu asturianista, mal pue acabar la cosa cuando a pocos meses d'asumir el cargu asume tamién -y tan rápido- la visión restrictiva de los derechos ciudadanos que fai la FSA. Que fale de la necesidá de más consensu y de que la defensa de la oficialidá ye una postura minoritaria resulta irónico viniendo de quien vien". La XDLA quier recorda-y a Consuelo Vega que "l'asturianismu cultural lleva venticinco años lluchando pola reconocencia de los derechos llingüísticos y que naide-y pue dar llecciones d'afán de consensu".