La Xunta Pola Defensa de la Llingua entama una plataforma pa enxertar la oficialidá na reforma l’estatutu

Énte la posibilidá, cada vegada más real, de que se reforme l'estatutu d'autonomía d'Asturies, la Xunta Pola Defensa de la Llingua Asturiana quier tener voz propia nesi procesu col envís de que, al revés de lo que pasó n'anterior reforma de va ocho años, esta vegada sí haya oficialidá.
Pa ser a consiguir esi oxetivu, la Xunta va sacar alantre una plataforma amplia abierta a organizaciones polítiques, sociales, culturales y de toa triba na que l'únicu puntu de consensu de tolos que s'enxerten nella seya l'algamar la oficialidá del asturianu na próxima reforma estatutaria, una reforma que la Xunta ve que, anque vien inducida dende Madrid y nun sal de los propios políticos asturianos, ye la ocasión afechisca pa plantegar de manera definitiva la cuestión de la oficialidá del asturianu.



Según esplicó a Asturies.com Fernando Álvarez Balbuena, la Xunta Pola Defensa de la Llingua Asturiana decidió dar esti pasu alantre porque entiende qu'esta reforma va ser el momentu pa que caiga la oficialidá del asturianu y failo precisamente agora que ta entamando a falase d'una hipotética reforma porque la organización cívica de defensa del idioma quier garrar la iniciativa y non andar al rau del procesu políticu que se pueda desencadenar d'agora en p'alantre, anque la presentación oficial d'esta nueva plataforma nun va facese formalmente hasta'l xueves 27 de mayu a les ocho de la tarde nun actu públicu nel salón d'actos del Muséu de Belles Artes d'Asturies, el mesmu llugar onde se fexo l'asamblea fundacional de la Xunta pola Defensa de la Llingua Asturiana va agora venti años.

Dende esti llugar fundacional, la Xunta quier entamar un procesu abiertu a tola sociedá pa consiguir la tan negada oficialidá. Fernando Álvarez Balbuena esplicó que la Xunta ta convencida de que la situación nesta ocasión ta muncho más madura que va ocho años y qu'esta vegada ""tien que caer"" la oficialidá. Según el representante de la Xunta, por poner dellos casos, mientres per una parte les encuestes sociolóxiques de Llera Ramo espeyen una masa social que que reclama la oficialidá, per otra parte, yá nesti procesu de prerreforma, los mesmos representantes de los partíos políticos tan faciendo referencies al tema de la oficialidá, signos toos ellos qu'apunten hacia la oportunidá de plantegar el debate al traviés d'esta nueva plataforma

Pa que la oficialidá se faiga efectiva, la Xunta quier qu'esta vegada seya una cuestión asumida tanto por tolos partíos políticos, con especial atención a PP y PSOE nesti sentíu, como por tola sociedá asturiana. Na consecución d'esti oxetivu la Xunta Pola Defensa de la Llingua Asturiana nun va escatimar esfuerzos, y por ello yá s'adelantó que, al traviés d'esta plataforma, va llevase alantre un esfuerzu ""pedagóxicu de desintoxicación"" pa facer llegar a la sociedá asturiana'l valor positivu de la declaración d'oficialidá y desaniciar los significaos negativos como los d'imposición y obligación qu'axentes contrarios a la normalización del asturianu foron amestando a lo llargo de los años a la palabra totémica de la reivindicación asturianista. Trátase con ello d'abrir el procesu de normalización a capes y sectores hasta agora contraries a la oficialidá hasta algamar un consensu social definitivu. Amás d'esi llabor de dar a conocer, la Xunta tampoco nun va dexar de llau la movilización, que va ser otru de los pegoyos en que se tenga la campaña.

La presentación d'esta nueva plataforma supón un nuevu desarrollu de la llinia d'acción qu'entamó la Xunta Pola Defensa de la Llingua Asturiana cuando va dos años presentó'l documentu ""Ponencia Abierta"" un testu qu'alvertía de la situación d'ataque sistemáticu al idioma que taba viviéndose naquel tiempu y que facía un llamáu esplícitu a ""Tresformar la posición mayoritaria de la sociedá a favor de la oficialidá del asturianu y de la so normalización social nuna voz con pesu que se sienta nel Gobiernu del Principáu"". Precisamente van ser les más de 100 organizaciones que firmaron la ponencia abierta, y ente les que taben Comisiones Obreres, Suatea, Izquierda Unida, URAS, Andecha Astur, IAS o'l Partíu Asturianista, a les que primero s'empobine la Xunta pa convidales a participar nesti nuevu procesu."