La Xunta pola Defensa de la Llingua Asturiana denuncia presiones contra la escolarización n’asturianu

La organización Xunta pola Defensa de la Llingua Asturiana emitió ayeri un comunicáu en qu'acusa a la dirección del Institutu d'enseñanza secundaria de Pando n'Uviéu de "negáyos a 7 alumnos matriculaos en primera optativa d'asturianu la posibilidá d'estudiar l'asignatura y disvialos a otres optatives". La organización califica los fechos de "otra situación más de discriminación llingüística na enseñanza" y asegura que la dirección del centru "vulnera la llei". La Xunta afonda nos fechos, asegurando que "Nun primer momentu llegó a mentise (a los alumnos) dicíendo qu'en Bachilleratu nun yera obligatorio ufiertar l'asignatura", p'acabar reconociendo "que se mandaba a los alumnos pa otres asignatures pa que d'esta manera se cubrieren los mínimos a los que nun llegaben" asegurando igualmente la Xunta que "ye'l tercer añu que s'acaba col grupu d'asturianu en bachilleratu nesti institutu".

La Xunta afirma tar en conocimientu de más casos asemeyaos n'otros centros d'enseñanza y comenta sobre ellos que "los más graves atopámolos en secundaria y bachilleratu, onde l'asignatura ye optativa y tien que competir con otres asignatures y los equipos directivos de munchos centros; y na enseñanza concertada, onde en muchos casos nun s'ufierta o se fai ensin respetar la llei, como'l casu de Loyola que yá denunciemos esti branu y nel que se mentía a los padres col fin de que nun matricularen a los fíos n'asignatura d'asturianu". Otros casos que se referencien na nota de prensa son el del institutu de Turón, "onde se quitó un grupu d'asturianu con tres neños matriculaos mientres n'otros institutos como'l casu de Santa Bárbara en La Felguera ponse escuela d'asignatures optatives que nun son asturianu con un neñu namás o nel institutu de Candás onde a un neñu que nun garró l'asignatura en primero nin en segundu nun lu dexaben matriculase na ESO". Nel mesmu institutu de Candás denúnciase'l casu d'otru alumnu "espulsáu d'educación billingüe por negase a garrar de primera optativa francés cuando él quería matriculase n'asturianu, lo que ye otru incumplimientu grave de la llei".

Dende la Xunta coméntase sobre esta situación que ye de llamar l'atención qu'esto asoceda "pocos díes depués de que'l conseyeru d'educación José Luis Iglesias Riopedre declarare les bondaes de la educación billingüe" y diz que "paez que pal señor conseyeru l'asturianu nun ye una llingua, pues los alumnos qu'escueyen estudiar esta asignatura nun atopen más que dificultaes, nun se respeta'l so derechu a estudiar asturianu y incúmplese contínuamente la llei, ensin que la inspección de la Conseyería faiga nada por evitalo". La organización esíxe-y a la Conseyería d'Educación "que que nun mire pa otra parte y faiga que se cumpla la llei, dende la Xunta vamos tomar toles midíes que sean necesaríes pa que se respeten los derechos de los alumnos y de los maestros d'asturianu poniéndonos al serviciu d'ellos".