La Xunta pide una "nueva política" pa la llingua y una reforma estatutaria

|

La organización echa en falta la política llingüística nes negociaciones pa formar gobiernu y fai una comparanza con otres comunidaes como Aragón o Valencia

Nun comunicáu la Xunta pola Defensa de la Llingua Asturiana recuerda que "nel País Valencianu la política llingüística ta visibilizándose como ún de los exes vertebradores del cambiu políticu y de la visión nueva sobre'l futuru d'esa tierra, mentes que n'Aragón va existir pela primer vez na historia una Dirección Xeneral de Política Llingüística, xestionada amás pol ala más aragonesista del Gobiernu autonómicu".

Según la organización "el mesmu camín de meyora na visibilidá y usu del idioma propiu parez que van siguir Navarra y conceyos tan importantes del Estáu como A Coruña, Pamplona o Valencia".

Sicasí, la Xunta amuesa'l so esmolecimientu porque n'Asturies "los idiomes propios parez que nun tán xugando nengún papel nes negociaciones pa formar un Gobiernu nuevu" y nuna referencia a IU y Podemos fala de que nun se pue dar carta blanca a candidatos como Javier Fernández "que nes últimes décades vien faciendo tolo posible por facer desaparecer la llingua asturiana como vehículu de comunicación".

Per otru llau l'asociación de defensa de derechos llingüísticos fala de que se ta abriendo "un procesu de reformes estatutaries nos territorios nos qu'estos cambios llexislativos quedaren paraos. Un exemplu son les Isles Canaries, que nel mes de marzu pasáu aprobaron una reforma qu'agora tien que llegar al Congresu. Per otru llau, nel País Valencianu yá iniciaron los trámites pa siguir esi camín y desbloquiar la so reforma".

Nesi sen, la Xunta pide a "los partíos comprometíos colos derechos de les persones falantes d'asturianu" que trabayen por una reforma qu'asegure "la igualdá en derechos fundamentales que trai oficialidá"  y "un cambiu radical nes polítiques de normalización llingüística".

Contador Estadistiques