La Xunta Eleutoral refuga’l recursu de Foro de Ciudadanos sobre’l recuentu del votu emigrante

El PSOE mantién el diputáu ganáu pol occidente gracies al votu emigrante. La Xunta Eleutoral decidió refugar el recursu presentáu por Foro de Ciudadanos que pidía anular la totalidá de los votos del esterior por 332 sufraxos.
 
La razón qu’argumentaba’l partíu de Francisco Álvarez-Cascos yera qu’estos votos llegaron al país per corréu y non al traviés de la Oficina Consular. Amás, a la hora del recuentu, foron amestaos col restu del votu emigrante, polo que reclamaban la nulidá de tolos sufraxos veníos de fuera del país. La resolución de la Xunta Eleutoral dexa claro que nun hai nenguna constancia de que la eliminación d'esos 332 votos, referíos nel recursu de Foro, fuera a tener nenguna influencia sobre'l resultáu de les eleiciones. "La incidencia –la perda d'un escañu de Foro en beneficiu del PSOE– prodúxose sobre'l conxuntu de la votación de los eleutores residentes nel esterior, pero non necesariamente de los 332 votos unviaos a la Junta Electoral Provincial y computaos por ésta", señala'l testu del alcuerdu.
 
Asina, apunta que "nun ye posible saber a ciencia cierta cuántos d'esos 332 votos irregulares correspuenden a la circunscripción occidental y, amás d'ello, si pudieron tener incidencia nel resultáu eleutoral". Por esti motivu, considera una midida desproporcionada" l'anulación de los 2.531 votos del Censu de Residentes Ausentes (CERA), que solicitaba Foro. Amás, dexa claro que la unviada del votu direutamente a la Xunta Eleutoral, en llugar d’al Consuláu correspondiente, considérase una irregularidá non invalidante", unviándose a la Llei Eleutoral. “Nun hai nenguna otra tacha d'irregularidá salvo la puramente formal del llugar al que s'unvió'l votu", incide.
 
Por último, fai referencia tamién nel cumplimientu de dos aspeutos qu'aseguren el "caráuter garantista" d'esti procedimientu del votu per corréu: el procedimientu de votu rogáu pa confirmar la condición d'eleutor de la persona solicitante de votu y la comprobación de la so identidá. "La irregularidá denunciada pola formación recurrente nun se refier a nengún d'estos aspeutos, sinón a una cuestión puramente formal", señala la Xunta Eleutoral.
 
Foro va tomar una decisión el miércoles
 
La direición de Foro, tres conocer la decisión de la Xunta Eleutoral, encamentó a los servicios xurídicos l'estudiu correspondiente, col fin d'adoptar una decisión pola Comisión Direutiva del partíu, que va reunise a tal fin el miércoles.