La Xunta denuncia un intentu d'instrumentalización de la convocatoria del 5 de marzu

L'apaición de cartelos convocando a la manifestacióndel prósimu sábadu cola firma del "Ensame Pola Oficialidá" vese dende la Xunta como una "agresión"

Dende la selmana pasada, xunta los carteles qu'anuncien la manifestación que convoca'l Conceyu Abiertu Pola Oficialidá pal próximu sábadu día 5, tan apaeciendo otros cola firma del "Ensame pola oficialidá" Estos cartelos van illustraos con un fotomontaxe nel que, sobre una semeya antigua na que pue vese a trés axentes de la Guardia Civil coles cares fotomontaes del presidente asturianu Vicente Álvarez Areces, el Conseyeru Javier Valledor y el responsable de la Oficina de Política llingüística Ramón d'Andrés. El cartelu de la polémica anúnciase col testu "estes son les tropes que prohiben l'asturianu y mos traen el galleguismu"


Énte l'apaición d'estos cartelos, la Xunta pola Defensa de la Llingua Asturiana, organización creadora del Conceyu Abiertu Pola Oficialidá ta acabante de facer públicu un comunicáu en que denuncia "l'intentu d'instrumentalización" de la manifestación del 5 de marzu "por parte d'un colectivu ayenu a la convocatoria".


Según la Xunta, l'únicu lema de la manifestación ye'l de "Na Reforma del Estatutu, L'Asturianu Llingua Oficial" polo que la organización diz que ve "con indignación y sorpresa l'apaición d'unos carteles cola firma "Ensame pa la Oficialidá", nos qu'apaez una convocatoria de manifestación pal mesmu día, hora y llugar." La Xunta diz que quier dexar bien claro qu'esi colectivu llamáu "Ensame pa la Oficialidá" nun pertenez nin tien rellación nenguna col Conceyu Abiertu pola Oficialidá nin cola convocatoria de la manifestación del día 5 de marzu y interpreta estos fechos como una agresión a y como un intentu claru d'instrumentalización del trabayu de la Xunta pola Defensa de la Llingua. La Xunta destaca tamién que "la imaxe y los conteníos agresivos y fuera de llugar d'esos carteles son diametralmente opuestos y enfrentaos a la propuesta de trabayu de la Xunta y del Conceyu Abiertu pola Oficialidá".