La Xunta congráciase de la presencia plural de la sociedá asturiana na manifestación del 5 de marzu

La Xunta Pola Defensa de la Llingua Asturiana ta acabante de facer pública una valoración oficial sobre la manifestación del pasáu sábadu 5 en defensa del reconocimientu de la oficialidá na reforma del estatutu.

La valoración de la Xunta, organización fundadora de la plataforma Conceyu Abiertu pola Oficialidá, nun pue ser más positiva. La Xunta fala d'un "ésitu claru" y diz que "pesie al mal tiempu, que torgó delles actividaes de les que se teníen previstes, la sociedá asturiana tuvo presente na manifestación en tola so pluralidá, con xente de toles edaes y condiciones participando na manifestación, cosa que rescampló na cabecera de la marcha, que tuvo un marcáu calter social y non políticu". La Xunta opina que l'ésitu de la manifestación afogó toles voces crítiques que nes últimes selmanes ficieren comentarios desmoralizantes sobre la oportunidá de la convocatoria y afirma que la llinia de trabayu abierta pola plataforma Conceyu Abiertu ye "la llinia a siguir".

Otramiente, anque pa la Xunta ye prematuro falar de posible incidencia de la protesta sobre la clas política asturiana, dende la organización detácase la importancia que tenía que l'asturianu y la reforma estatutaria "apaecieren nel debate social". La Xunta nun quier facer valoraciones sobre los incidentes qu'asocedieron con un grupu de manifestantes del partíu políticu Andecha Astur y sorraya que'l calandariu de movilizaciones del CAO va siguir cola xunta que van tener les organizaciones de la plataforma d'equí a la vuelta de 10 díes na que van decidise acciones futures.


Aparte del llabor de la Xunta nel CAO, la organización va centrase tamién a curtiu plazu na organización del prósimu conciertu pola oficialidá, que va celebrase'l 23 d'abril n'Uviéu