La xornada ‘L’asturianu na era dixital’ busca en Xixón dar a conocer la presencia del idioma na rede

“Promover la normalización del asturianu al traviés de les nueves tecnoloxíes de la información, la comunicación y el fomentu de les TIC” ye ún de los oxetivos de la xornada ‘L’asturianu na era dixital’ que va celebrase en Xixón el 10 de payares, rescampla la conceyala Ana Montserrat López Moro. Abiertu a persones de toles edaes, va dar a conocer les ferramientes esistentes na rede en llingua asturiana.

L’académicu y gran conocedor del mundu informáticu Xandru Martino va encargase de poner esti taller de baldre que va desenvolvese per trés hores n’horariu verspertín y que, como recordó la edil de Cultura, Mocedá y Museos, ta “enmarcáu nel Plan de Normalización Llingüística”. “Dende la Conceyalía de Cultura somos conscientes de qu’una parte básica del trabayu de la dignificación social del asturianu pasa por averalu a les distintes estayes de la sociedá, por usalu con normalidá en tolos ámbitos, porque entá siguimos careciendo les consecuencies d’un procesu secular de minorización”, arrancó López Moro la presentación de les Xornaes d’Informática ‘L’asturianu na era dixita’l celebradada esta mañana na sala de conferencies del Centru de Cultura Antiguu Institutu.

“Los usos tecnolóxicos constituyen, per un llau, un reflexu claru y precisu del usu de la llingua fuera del ámbitu familiar, y, per otru, un espaciu llenu de posibilidaes hacia’l qu’enfocar nuevos esfuerzos normalizadores venceyaos a les nueves ferramientes tecnolóxiques de la información y la comunicación. El mundu dixital ye una oportunidá, un retu, pa esparder y caltener el patrimoniu cultural y llingüísticu asturianu”, considera la conceyala de Foro, qu’apunta que “les y los falantes de cualquier idioma pueden agora convertise en suxetos activos y creadores de conteníu, y tener accesu, siempre que dispongan de los medios necesarios, a una xigantesca rede na que puedan crear el so propiu espaciu de convivencia y participación dixital nel so idioma”.

Pa dar a conocer les posibilidaes qu’ofrecen les nueves tecnoloxíes entámase esta xornada que va “dar a conocer la presencia y l’usu del asturianu nes diferentes plataformes dixitales y ver la influencia d’estos recursos na revitalización de la nuesa llingua. Sabemos que pa delles persones, sobre too pa les de más edá, ye difícil movese nesti mundu d’aparatos interconectaos, polo que queremos oferta-yos una ferramienta pa que sepan qué ye esto de la informática, Internet, redes sociales o les aplicaciones móviles”.

Pa mozos y menos mozos

L’Espaciu Mozu de la Escuela de Comerciu de Xixón va acoyer les diferentes temes del cursín, que va arrancar a les 16 hores y va allargase hasta les 19.15 hores. “Que seya nel Espaciu nun quier dicir que seya esclusivamente pa xente mozo, porque digamos que tien un doble sentíu”, especificó al respeutu María Xosé Rodríguez López, reponsable de la Oficina de Normalización Llingüística de Xixón.

“Per una parte, como bien diz la conceyala, pa la xente que yá tenemos cierta edá va ser una manera práutica de desenvolvese nesti mundu nuevu ente comines de la informática pa conocer qu’hai, que podemos poner nos teléfonos móviles”, esplicó, faciendo referencia a la posibilidá esistente anguaño de “tener una especie de WhatsApp, el Telegram, l’Asturgram n’asturianu; que podemos baxar sistemes operativos pa funcionar con too n’asturianu; qu’esiste un buscador n’asturianu… Hai una serie de ferramientes qu’igual se desconocen”.

Y al empar, “la xente mozo, que yá ta más avezao a tou esti tipu de ferramientes nueves y nacieron y tán medrando cola era dixital, pa que conozan un poco ónde entamó too, porque yá va más de 25 años que l’asturianu ta presente na rede y, dende entós p’acá, pasu ente pasu, va afitándose nesti mundu de la era dixital nueva, de la tecnoloxía, lo que pasa que cuerre tan a priesa qu’a veces nun da tiempu a llegar a too”.

Pero tamién la xornada va ser “una manera d’averase a conocer los proyectos collaborativos qu’esisten n’asturianu y cómo podemos ser parte d’ellos, qué recursos hai y cómo se puede navegar n’asturianu pela rede, y per otra parte, mui importante tamién, l’ociu dixital y l’asturianu”. Una iniciativa de baldre pa la que va abrise la inscripción el miércoles al traviés del corréu electrónicu llinguaasturiana@xixon.es.

Estructura del cursu

‘L’asturianu na era dixital’ va abrise a les 16 hores con una presentación de los oxetivos y una introducción a la presencia del asturianu n’Internet. A les 16.15 hores va entamase con ‘Proyectos collaborativos y el so papel na promoción del asturianu’, como Wikipedia, les iniciatives de Softastur o OpenStreetMaps y StreetComplete.

Llueu d’una posa, a les 17.15 hores van centrase los conteníos nos ‘Recursos d’ofimática y navegación n’asturianu’ y, a les 18 hores, con ‘L’ociu dixital y l’asturianu’. Un espaciu pa entrugues y discusión, a les 18.45 hores, va preceder al puntu final, a les conclusiones y el pieslle.

Los asistentes van recibir amás el ‘#Restol@andoPelaRede. El pallabreru de la informática’, publicación del 2022 de la Oficina de Normalización Llingüística con testos de Víctor Suárez que tamién ta valiendo pa desenvolver un taller ente alumnáu de segundu de Secundaria nos institutos de Xixón.

Na semeya, Rodríguez López, López Moro y Aitor Martínez Valdajos, direutor de la Fundación Municipal de Cultura, Educación y Universidá Popular.