La XE reclama la devolución de 198 millones n’ayudes por irregularidaes na ampliación d’El Musel

|

La Oficina Europea de Lucha contra’l Fraude (OLAF) de la Comisión Europea reclama la devolución de 198 millones d’euros n’ayudes a la obra d’ampliación d’El Musel. Atopó irregularidaes na axudicación a la XTE Dique Torres.

Según informa güei’l diariu ‘La Nueva España’, el Gobiernu estatal yá conoz esta decisión de la oficina autónoma de la Comisión Europea, anque nun se trata de la conclusión del procedimientu sancionador, que podría tardar dellos meses. A esta cantidád de 198 millones que se podía perder, hai que sumar otra retenida de 49 millones d’euros por mor de les denuncies presentaes énte unes obres que supunxeron un sobrecostu de 130 millones d’euros sobre’l presupuestu d’axudicación, según les cifres daes nel 2011 pola propia Autoridá Portuaria de Xixón tres el final de les obres, anque nel 2007 apuntaba a un sobrecostu de les obres de 216 millones. El costu total de construcción del nomáu ‘superpuertu’ foi de 630 millones.

Esta reclamación de la OLAF vien tres les denucies presentaes nos años 2007 y 2008, ente elles les d’Andecha Astur al traviés de Mikel Irujo (Eusko Alkartasuna), eurodiputáu de la coalición Europa de los Pueblos, de la que formaba parte la organización asturiana. “Andecha Astur considera d'estrema gravedá les consecuencies d'esti fraude na mayor obra en cuantu presupuestu llicitada na historia d'Asturies, y que de lao man d'Areces y Buendía atópase enartáu nel estáu de corrución sistemática y redes clientelares aniciáu polos estremaos gobiernos PSOE-IU n'Asturies”, apunta la organización güei nun comunicáu nel que amuesa’l so esmolecimientu poles repercusiones que pueda tener esti fechu nel futuru, yá que, “amás del impactu económicu pola devolución de les subvenciones, supón una perda de credibilidá de les instituciones asturianes n'Europa, que dificultará l'accesu a futures ayudes”. D’igual forma, recuerda que “ésti nun ye nin el primeru nin el caberu de los fraudes denunciaos por esta organización énte la OLAF, el postrer d'ellos el de La Casa del Agua en Sobrescobiu”, denuncies que siguen en trámite y pola que l’oficina autonóma de la Comisión Europea yá solicitó información a les instituciones asturianes.

Los Verdes d’Asturies, integraos agora n’Equo, tamién denunciaron énte la OLAF la solicitú fecha nel 2007 de más fondos de cohesión pa la obra del ‘superpuertu’. Güei, los ecoloxistes anunciaron que van pidir un procesu penal poles irregularidaes detectaes n’El Musel.

 

Contador Estadistiques