La Xunta pola Defensa de la Llingua Asturiana (XDLA) pide al Gobiernu nuevu una estructura que visibilice l’idioma y qu’asegure los derechos de los falantes. Tamién solicita que se mantenga la Direición Xeneral de Política Llingüística.
 
Según esponen dende’l coleutivu ciudadanu, ye “fundamental” pa l’asturianu “la presencia efectiva nel Gobiernu de cargos con capacidá y rangu pa poder sacar alantre les midíes contemplaes na llexislación pa desenvolver polítiques afayadices pal futuru de la llingua asturiana”. Nesi sen, la XDLA pide al Executivu de Javier Fernández “abrir una dómina nueva qu'asegure, non solo los derechos básicos, sinón tamién la tresmisión interxeneracional y el prestixu públicu pal idioma”.
 
Pa llegar a esti puntu consideren necesario la tresversalidá n’Alministración. “A los tradicionales ámbitos de Cultura y Educación –onde l’asturianu ha tener la más alta representación política y alministrativa–, han sumase les demás conseyeríes que, coordinaes dende la Presidencia, tienen que tener la capacidá real de facese presentes y vertebrar tol territoriu asturianu al traviés del nuestru idioma”, espliquen. Otra manera, la organización entiende que la fusión de les conseyeríes de Cultura y Educación “nun pue suponer recortar el rangu qu'hasta'l momentu tuvo l'idioma dientro del organigrama del Gobiernu. Por eso, la XDLA solicita'l mantenimientu de la Direición Xeneral de Política Llingüística dientro de l'actual conseyería que dirixe Ana González”. Dende la XDLA entienden que la estructura nueva, amás, “pue permitir una mayor coordinación ente les midíes de promoción social y les desarrollaes nel ámbitu educativu, dos estayes fundamentales p'asegurar el futuru de la llingua asturiana”.