La XDLA pide a los partíos con representación na Xunta Xeneral qu’igüen la situación “predemocrática” que vive l’asturianu

|

La situación dantesca que se vivió’l domingu eleutoral, cola retirada de papeletes a Andecha Astur por tar n’asturianu, lleva a la Xunta pola Defensa de la Llingua Asturiana (XDLA) a demandar a los partíos con representación na Xunta Xeneral que pongan fin a “estes actitúes propies d'un periodu predemocráticu”. Recuerda que ye un incumplimientu de la llexislación vixente, tanto nacional como estatal y europea.

“La esistencia de mayoríes nueves va permitir –si les otres partes nun exercen un bloquéu– avanzar llexislativamente nel reconocimientu de derechos y nel desarrollu real d'una planificación llingüística afayadiza pal casu asturianu”, apunta la organización cívica, que ve positivo la representación nos conceyos de país, yá sía nel gobiernu llocal o na oposición, de “partíos políticos que llevaben nel programa un compromisu esplícitu col idioma de la nuestra tierra”. Nesi sen recuerda “la importancia de desarrollar una política lingüística a nivel de los conceyos, quier dicise, dende les alministraciones más averaes al ciudadanu”.

La XDLA calca sobre manera na necesidá de dar pasos alantre “na recuperación de la toponimia tradicional –hailos tovía que nun dieron el primer pasu pa empezar el procesu–, na estabilidá de los servicios de normalización y nos derechos llaborales de los sos empleaos, y nel desarrollu d'una política llingüística municipal, midíes que munches veces nun suponen nengún costu añadíu”. No que respeuta a nivel nacional, demanda “acabar colos casos claros de represión exercíos contra les persones que quieren utilizar el so idioma na vida cotidina y nel exerciciu de los sos derechos democráticos como ciudadanos”.

Contador Estadistiques