La XDLA abre la revisión del Llibru Blancu aldericando sobre Educación

El Centru de Cultura Antiguu Institutu acueye esti xueves la primer de les cuatro xornaes coles que la Xunta pola Defensa de la Llingua Asturiana (ALLA) va facer una revisión del Llibru Blancu. Esti documentu cumple 15 años.

‘Enseñanza: de la presencia a la normalización’ ye’l nome de la mesa-taller que va tener llugar esta tarde en Xixón, ente les 18 y 20 hores, cola participación de Xosé Antón González Riaño, profesor de Didáctica na Universidá d’Uviéu; Beatriz Quirós, presidenta de la Xunta de Personal Docente; Paz Fonticiella, profesora de Llingua Asturiana en Secundaria; y Iris Díaz, profesora de Llingua Asturiana en Primaria. Too ello baxo la moderación de Xosé Candel.

Dende la organización recuerden que “hai agora quince años, allá pel 1996, la Xunta pola Defensa de la Llingua Asturiana espublizaba’l so Llibru Blancu de la recuperación y normalización llingüística d’Asturies, ún de los pocos trabayos de reflexón sociollingüística n’Asturies. Esti llibru yera un marcu d’orientación que venía, según esplicaba'l prólogu, ‘a dar cuenta tanto de la situación actual como de les perspectives de futuru de delles estayes que tenemos por fundamentales: la enseñanza, los medios de comunicación, la llexislación, l’almistración y la normativización’. Tres llustros depués, la XDLA quier “analizar cuála ye la situación cuando entama la segunda década del sieglu XXI; qué s’avanzó nos quince años que colaron y, sobre manera, cómo pue ayudanos una reflexón nueva p’actualizar les estratexes y les propuestes que dende un movimientu de reivindicación llingüística han facese pa encarar con fuerces anovaes un futuru inciertu pa la llingua”.

Por ello s’entamen esti ciclu de cuatro meses-talle baxo’l títulu ’15 años de Llibru Blanco: revisión y actualización de la Política Llingüística’ qu’entama güei en Xixón y que va continuar n’Uvién, en concreto na sala d’actos del Departamentu de Filoloxía Española de la Universidá d’Uviéu. El 1 de febreru va ser el turnu de ‘Medios de Comunicación na sociedá de la información’, cola participación de los periodistes Naciu Varillas, Ana Vanessa Gutiérrez, Próspero Morán y Cristóbal Ruitiña, y la moderación de Rubén Ardura; el 15 d’esi mesmu mes, 'Hacia la consolidación y espansión de los Servicios de Normalización Llingüística', con Penélope Miranda y María Xosé Rodríguez (trabayadores de servicios de normalización), Adolfo Camilo (xestor cultural) y Esteban Intrialgo (abogáu), y la moderación de Mónica Riesgo; y el día 29, 'Recuperación y normalización llingüística d'Asturies', cola presencia de Carlos Pulgar (voceru de la XDLA), Ramón d'Andrés (profesor de Filoloxía Asturiana na Universidá d'Uviéu) y David Guardado (filólogu), y la moderación de Llucía Menéndez. Toles meses-talles van entamar a les 18 hores.

Comparte...                                    

Enllaz permanente