La Wikipedia n'Asturianu cumple 10 años

|

Los díes 12 y 13 de setiembre la comunidá d'usuarios de Wikipedia n'Asturianu organiza, en collaboración con Wikimedia España, la celebración del décimu aniversariu de la enciclopedia llibre n'asturllionés. Los actos tendrán llugar nel Auditoriu Príncipe Felipe (Plaza La Gesta, Uviéu) y cuntará con distintes actividaes.

«Zazaki» ye'l nome de la entrada de la primer edición d'un artículu na Wikipedia en llingua asturiana, yera un 26 de xunetu de 2004. Diez años dempués ésta cuenta yá con cerca 20.000 artículos y alredor de 800.000 ediciones, númberu que sigue aumentando día a día gracies al llabor de decenes de voluntarios. Posteriormente naceríen les versiones nesti idioma d'otros proyectos hermanos, como Wikicionariu, Wikisource y  Wikiquote.
Alministraos pola Fundación Wikimedia, toos ellos formen en conxuntu parte d'un movimientu surdíu en xineru de 2001 col oxetivu de divulgar de manera llibre la suma del conocimientu humanu.

Con motivu d'ello, Wikipedia n'asturianu y Wikimedia España entamen unes xornaes pa celebrar l'aniversariu y dar a conocer los proyectos Wikimedia n'asturllionés. L'asociación Wikimedia España (www.wikimedia.es) ye una organización ensin ánimu de llucru creada col fin de favorecer el desenrollu del Conocimientu Llibre promoviendo aquellos proyectos acoyíos pola Fundación Wikimedia en toles llingües que se falen n'España.

Na primer xornada del vienres 12, a les 17:30 h y tres un pequeñu repás d'estos diez años, realizaráse una charra d'introducción al funcionamientu de Wikipedia, a lo que siguirá un taller pa deprender a editar na so versión n'asturianu. El sábadu 13 a les 11:00 h, dientro yá de la segunda xornada, escomenzará con un homenaxe lliterariu a Caitano Bardón (Carrizu, Llión, 1881) en collaboración colos colectivos Fame Poétika y l'asociación Faceira, asitiada en Llión. Nésti lleeránse dellos testos n'asturllionés col acompañamientu musical de Fran Allegre. Arriendes d'ello, presentaráse un Wikiproyectu sobre deporte n'Asturies y pondráse fin al eventu con una Mesa Redonda sobre "Llingua y Medios". La entrada ye llibre y gratuita.

Asina, a lo llargo de la fin de selmana, Wikimedia España celebrará tamién la so Asamblea Añal de Socios en Uviéu.

 

PROGRAMA

Vienres 12 de setiembre
17:30 h Apertura: 10 años de Wikipedia n'Asturianu.
17:45 h Wikipedia: qué, quién, cómo. Introducción al so funcionamientu.
18:30 h Taller d'edición en Wikipedia n'asturianu.
20:30 h Wikialcuentru con cena~espicha

Sábadu 13 de setiembre
11:00hs Homenaxe a Caitano Bardón
(Collaboren Fran Allegre, Asociación Cultural Faceira y Fame Poétika).
12:30 h Presentación del Wikiproyectu "Deporte n'Asturies".
13:00 h Mesa Redonda "Llingua y Medios".
14:00 h Wikialcuentru con xinta~espicha

(https://ast.wikipedia.org/wiki/Uiquipedia:Alcuentros/Celebración_del_10u_Aniversariu)
 

Contador Estadistiques