La web del Conceyu de Siero: en castellanu, inglés, francés, alemán y italianu..., pero non en llingua asturiana

Iniciativa pol Asturianu considera "incomprensible" l'ausencia del idioma y propón que se recupere "p'afondar na normalización".

Na web nueva del Conceyu de Siero desapaez la llingua asturiana. L'alcalde Ángel Antonio García González 'Cepi' y el conceyal de Facienda, Contratación, Dixitalización, Organización y Réxime Interior, Alberto Pajares, presentaron la páxina'l martes, que cuenta con versión en castellanu, inglés, francés, alemán y italianu, pero non n'asturianu.

La organización que trabaya pa la so presencia en tolos ámbitos valora "el procuru pa, salvo escepciones, recoyer la toponimia oficial", pero considera que "el desaniciu de la llingua propia de la páxina web ye una oportunidá perdida pa siguir normalizando l’idioma". Asina añade que "l’usu de la llingua asturiana nun supondría un costu superior, ya que la web cuenta con versiones" n'otres llingües.

D'igual forma considera que la supresión del idioma ye una decisión que choca frontalmente col propiu programa electoral de la FSA-PSOE y tamién confronta cola Llei 1/98, de 23 de marzu, d’Usu y Promoción del Bable/Asturianu que, nel so artículu 8, recueye que 'los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei concede a los ciudadanos residentes n’Asturies'". Pa Iniciativa pol Asturianu ye "incomprensible qu’un partíu que nel so programa electoral recueye’l reconocimientu d’oficialidá pa les llingües d’Asturies tolere pasos atrás na presencia igualitaria y normal de la llingua asturiana".

Recuperación del SNL

Los responsables d'esti coleutivu va treslladar a los grupos municipales del Conceyu la importancia d’esta midida asina como una propuesta pa sacar alantre en Plenu unes ordenances que recueyan el derechu al usu y regule’l mesmu na alministración municipal de Siero. Amás, la organización va solicitar tamién, a gobiernu y oposición, la recuperación del Serviciu de Normalización Llingüística "suprimíu pol gobiernu socialista d'Ángel García".

Na imaxe, capturar de la portada de la web nueva, coles banderes na esquina inferior izquierda que represente a los diferentes idiomes nos que ta accesible.