La Universidá d'Uviéu celebra les xornaes 'Nueves llendes na filoloxía asturiana'

Entámenles el Departamentu de Filoloxía Española, el Departamentu de Filoloxía Clásica y Románica, y el Seminariu de Filoloxía Asturiana.

Mañana y el xueves van desenvolvense na Sala de Conseyos del Departamentu de Filoloxía Española, na Facultá de Filosofía y Lletres de la Universidá d’Uviéu, les xornaes 'Nueves llendes na filoloxía asturiana'. Nella participen los profesores Enrique del Teso, Rosabel San Segundo, Julio Villa y Javier García Rodríguez, de la universidá asturiana, y José Enrique Gargallo (Universitat de Barcelona), que va poner la conferencia inaugural 'El asturiano en las grandes obras de la romanística contemporánea', Iraide Ibarretxe (Universidad de Zaragoza), Xosé Alfonso Álvarez Pérez (Universidad de Alcalá de Henares), Sara Gómez Seibane (Universidad de La Rioja) y el presidente de l'Academia Aragonesa de la Lengua, Javier Giralt, que va poner la ponencia final 'El espejismo de la España plurilingüe'.

Tamién va celebrase, mañana a les 16 hores, l'alderique 'La lliteratura asturiana nel mundu hispánicu', cola participación de Marta Mori, Francisco 'Paco Álvarez, Esther Prieto y José Ángel Gayol. "La investigación nel ámbitu de la llingua y lliteratura asturiana camina acordies coles tendencies más avanzaes de la filoloxía y llingüística d’esti momentu históricu", apunten dende la organización.

En concreto, les xornaes busquen un averamientu a cuatro grandes temes: "la relación ente la llingüística y les ideoloxíes, los nuevos horizontes na investigación gramatical asturiana, el contactu ente l’asturianu y otres llingües, y l’allugamientu de la lliteratura asturiana nel mundu hispánicu.